Manifestan ki te move kou kong akoz restriksyon ki an plas pou anpeche pwopagasyon viris COVID-19 la nan Lachin pran lari e yo mande prezidan pwisan peyi a rache manyòk li.
Se yon bagay moun poko janm wè nan Lachin.
Manifestan yo pran lari apre otorite yo nan omwens 8 vil te redi pou kraze manifestasyon yo Dimanch, ki reprezante yon defi ra e dirèk pou Pati Kominis ki o pouvwa a.
Lapolis te sèvi ak gaz piman bouk pou dispèse manifestan yo nan vil Shanghai ki tap mande demisyon Xi Jinping epi yon fen nan sistèm yon sèl kòk chante a.
Kèk hè d tan pi ta, moun te pran lari ankò menm kote a.
Lapolis te kraze dezyèm manifestasyon an e yon jounalis we yo arete plizyè manifestan epi bwote yo ale nan yon otobis.
Manifestasyon yo te tanmen Vandredi epi pwopaje nan plizyè vil, pami yo kapital la, Peken, ak plizyè douzèn kanpis inivèsite.
Se manifestasyon kote plis moun patisipe depi plizyè dizèn lane kote yo opoze pati ki o pouvwa a.
