Basketbolè Ameriken LeBron James ajoute yon lot tit sou koleksyon ni: milyadè.
Jedi, magazin Forbes estime ansyen vedèt Los Angeles Lakers la vo $1 milya. Li se premye jwè NBA ki aktiv ki rive nan stati sa a.
Michael Jordan, ke Forbes estime gen $1,7 milya, pat rive nan stati milyadè a pazavan 11 zan apre li te finn pran retrèt li.
Forbes estime James te antre $121.2 milyon ane pase a.
Afè tounen milyadè se yon defi James te di li te vle leve nan yon entèvyou ak magazin GQ an 2014.
"Si sa rive. Se pi gwo akonplisman mwen," James te di nan epok la. "Byen antandi mwen ta renmen amelyore biznis mwen o maksimom. E si mwen atenn objektif sa a, si mwen tounen yon atlèt ki vo yon milya dola, ho! Woololooooooy! Mezanmi, m'ap konan a mo!"
Malgre li te touche yon salè prèske $400 milyon pandan karyè li ak Lakers yo, Cleveland Cavaliers epi Miami Heat, voum lajan James fè depi li kite teren baskèt la eklipse sa. Forbes estime ke a laj de 37 an, misye antre plis pase $900 milyon gras ak envestisman biznis epi pwomosyon li fè pou divès pwodwi.
Pami envestisman ak biznis li yo gen Spring Hill Company, yon konbit ki gen ladann Uninterupted ak SpringHill Entertainment; Fenway Sports Group; yon fotfèy imobilye ki vo $80 milyon; epi Blaze Pizza.
James pat leve ak yon papa, se manman ni ki te leve li nan vil Akron eta Ohio. Misye envesti yon pakèt lajan nan vil natal li, kote li louvri yon lekol epi planifye pou konstwi kay ak yon sant kominotè pou ede fanmi ak timoun defavorize yo.
Sou teren baskèt la, James ranpote 4 chanpyona NBA, e yo te nomen li jwè pi valab lig la - MVP - 4 fwa. Lè fini yo te seleksyone li 18 fwa pou'l jwe nan ekip vedèt baskèt yo. Met sou sa, li genyen 2 meday lo Olenpik.
