Madi 24 me a, Larisi entansifye atak li yo sou fòs militè ikrenyen yo nan pati lès Ikè kote l ap eseye mete men sou rejyon Donbas la egzakteman 3 mwa jou pou jou apre Prezidan Vladimir Putin te pase lòd pou lame ris la anvayi peyi vwazen an avek espwa li t ap kapab okipe tout Ikrèn rapdiman epi ranvèse gouvènman Prezidan Volodymyr Zelenskyy a.
Batay yo konsantre sou vil Sievierodonetsk, ki anba kontwòl sòlda ikrenyen yo, sou riv oryantal Flèv Siverskyi Donets, avèk yon lòt vil ki rele Lysychansk, sou riv oryantal la. Sòlda ris yo ap deplase nan 3 direksyon pou yo ansèkle 2 vil sa yo.
Serhiy Gaidai, yon ikrenyen ki se gouvènè pwovens Louhansk, deklare: “Entansite kontzam yo sou Sievierodonetsk ranfòse plizyè fwa lavalè. Se detrui y ap detrui vil la tou senpleman.”
Gen anviwon 15 mil moun k ap viv nan vil sa a.
Ministè defans britanik la lanse yon avètisman kote l pale de enpòtans batay k ap dewoule nan rejyon an. Dapre sa ministè a di:
“Si Larisi mete men sou zòn Severodonetsk la, sa ta vle di se tout rejyon Louhansk Oblast la ki tonbe anba men okipan yo. Tandiske prensipal efò Moskou aktyèlman se mache pran Severeodonetsk, operasyon sa a reprezante sèlman yon pati nan kanpay Moskou lanse pou l sezi tout pwovens Donbas la.
