Nan entèvansyon li devan Konsèy Sekirite Nasyonzini an, Anbasadè Lachin, Geng Shuang mande BINUH (Biwo Entegre Naysonzini pou Ayiti) remèt bay konsèy la lis gang kriminèl kap fè ravaj an Ayiti yo epitou non chèf yo pandan yap konsidere ki mezi yo pral pran.
Shuang deklare: Pandan atansyon mond lan te fikse sou Nouyòk ak Asanble Jeneral la semèn pase a, "sityasyon Ayiti te ale de mal a pi.
Se Lachin ki te mande pou yo konvonke rankont sa a Lendi apremidi pou diskite sou yon sityasyon ki soulve gwo kè sote non sèlman bò kote Lachin men tout manm ki te pran la pawòl pandan rankont la.
Resolizyon 2645 Konsèy Sekirite a eksprime li pare pou pran mezi apwopriye ki taka gen ladann bloke byen oubyen anpeche moun kap apiye zak vyolans gang yo vwayaje, dapre Lachin.
"Fas ak sityasyon ki egziste a Konsèy a dwe tradwi pawol sa yo ann aksyon. Nou espere Etazini ak Meksik pral remèt ba nou pi vit posib yon pwojè rezolisyon epi oganize konsiltasyon pou ke konsèy la ka pran yon desizyon sou kestyon sa a."
Se souvan Lachin konn plenyen nan Konsèy Sekirite a pou di tout asistans kominote entènasyonal la bay Ayiti pa remèt anyen e ke fòk yo repanse taktik yo.
Anbasadè Chinwa a di: "Si nou pa kwape gang yo, Ayiti pap janm wè lapè."
Direktris BINUH a, Madan Helen La Lime te pran pa pawòl pandan rankont la tou, kote li detaye gravite sityasyon aktyèl la an Ayiti epi konsekans zak vyolans gang yo genyen sitou sou fanm ak timoun.
Nan yon entèvyou ak VOA Kreyòl semèn pase a, Sekretè d Eta Adjwen Etazini pou Zafè Emisfè Oksidantal yo te di Etazini pare pou pran sanksyon kont gang yo. Pa rapò ak lidè gang G9 la, Jimmy Cherisier, alyas Barbecue li te di "jou misye ap rive".
Korespondan VOA nan Nasyonzini, Margaret Besheer kontribye a repotaj sa a.
