Lèzetazini ak alye l yo montre madi y ap pouse pou pi devan avèk plis sipò pou fòs militè Ikrèn yo dekwa pou yo ka lite kont envazyon Larisi te kòmanse sa gen 2 mwa – yon èd ki prale pi rapidman e k ap ofri zam ki pi puisan.
Dabò, Lèzetazini “te bezwen kèk semèn” pou l deplase ekipman militè ak minisyon l ap voye nan Ikrèn. Se deklarasyon Sekretè Deta Antony Blinken fè devan Komisyon Afè Etranjè Sena a. Sepandan, jounen jodi a nouvo materyèl militè Etazini ap voye nan Ikrèn yo rive anvan 3 jou.
Chèf diplomasi amerikèn nan ajoute, apre li menm ak Minis Defans la, Lloyd Austin, te fin rankontre Prezidan Volodymyr Zelensky nan Kyèv pandan wikenn nan, 2 peyi yo antann yo pou di kisa yo bezwen ak kisa yo panse yo ka ofri.”
Madi a toujou, Lalmay fè konnen li pral voye zam lou nan Ikrèn pou la premyè fwa; li pral kòmanse ak kagezon 50 sistèm anti-ayeryen, daprè chèn nouvèl Bloomberg.
Minis defans Austin, ki t ap rankontre madi ak reprezantan 40 eta-manm l OTAN ak lòt peyi sou yon baz ayeryèn nan Lalmay, deklare Prezidan ris la, Vladimir Putin, “pa t janm imajine le mond antye t ap kanpe bò kote Ikrèn avèk tèlman rapidite e tèlman asirans.” Li ajoute:
“Se chak jou n ap jwenn plis apui pou Ikrèn pou l konbat envazyon Larisi a. Nou pa gen tan pou n pèdi. Nou dwe avanse ak yon vitès ki rele vitès lagè.”
Bò kote pa l, Sekrete Deta rele zorèy Minis Afè Etranjè ris la, Sergey Lavrov, poutèt li deklare lagè nan Ikrèn nan byen kapab debouche sou yon konfli nikleyè ant Larisi avek peyi oksidantal yo.
