Ozetazini, Senatè Repibliken veteran Richard Lugar –ki nan Komisyon Afè Etranjè Sena a-- pibliye yon rapò ki kritike anpil-anpil konpòtman prezidan ayisyen René Préval nan kad rekonstriksyon Ayiti a apre tranblemanntè tèrib 12 janvye 2010 la.
Rapò sa a ki genyen 16 paj e ke senatè Richard Lugar pibliye jedi 22 jiyè 2010 la, di Prezidan René Préval demontre yon kapasite limite pou l dirije rekonstriksyon peyi li. Dokiman an atire atansyon sou le fèt ke rekonstriksyon Ayiti a rete preske an plas akoz sa senatè a konsidere kòm yon mank volonte politik ak yon lidèchip fèb.
Rapò senatè Lugar la lanse yon apèl pou l mande mesye Préval ak gouvènman n nan pran bon jan dispozisyon pou yo rebati peyi a ke tranblemanndtè a sakaje.
Dapre dokiman an toujou, rekonstriksyon Ayiti repoze sou volonte politik lidè li yo pou yo jwenn yon tèt ansanm nan aplikasyon yon seri refòm prese prese, tankou sa fèt nan lòt peyi ki te viktim menm kalte dezas la. Pa genyen yon repons rapid bò kote gouvènman Pòtoprens la, daprè Senatè Lugar.
Senatè Lugar kontinye pou l di pou efò rekonstriksyon reyisi, Prezidan Préval oblije pran bon jan desizyon pou l abòde kesyon kle nan domèn politik la ak obstak ki reprezante yon menas pou pwosesis la e k ap fè Ayiti tounen yon peyi kote li difisil pou etranje al fè envestisman.
Yon deklarasyon ki akonpaye dokiman an presize « pèp ameriken an ak lòt donatè yo merite gen anfas yo yon patnè ki angaje nan efò rekonstriksyon an. Li jenan pou Kongrè a rekonsidere envestisman gouvènman ameriken an ann Ayiti si li gen dout sou patnerya ant Pòtoprens ak Washington. »
Donatè entènasyonal yo pran angajman pou yo debouse preske 10 milya dola pou rekonstriksyon Ayiti nan okazyon yon Konferans ki te deowule 31 mas pase a nan New York , avèk 5 milya 300 milyon y ap dekese pandan 18 mwa k ap vini la yo.