Finansman pou preparasyon seleksyon nasyonal Jamayik la pou Mondyal Foutbol Medam yo tèlman pa si e sèten, manman youn nan jwèz yo te pran responsabilite pou kotize lajan pou ekip la.
Se konsa Sandra Phillips-Brower lanse yon kanpay sou rezo ki rele GoFundMe a, ki rele "Reggae Girlz Rise Up". Li se manman jwèz Havana Solaun. Sit la rive kotize plis pase $45,000.
Yon lot kanpay Fondasyon Reggae Girlz la lanse te kotize plis pase $45,000 apati Madi 4 Jiyè.
Tou le 2 sit yo vize ede seleksyon nasyonal Jamayik la jere frè ki asosye ak Mondyal la, tankou pa egzanp fomasyon, vwayaj, manje ak apui pou anplwaye yo. Konpansasyon ladann tou. Seleksyon an ap antrene nan Amsterdam kounyea.
Madan Phillips-Brower deklare: " Si mwen ka rann vwayaj la pi alèz - kite yo konsantre sou sa yo renmen fè ki se jwe foutbol - (se sa map fè) yo pata dwe oblije gen kè sote pou politik oubyen goumen pou jwenn vol ak otèl."
Cheyna Matthews ak Khadija "Bunny Shaw te pami jwèz ki te pibliye deklarasyon byen long mwa pase a konsènan kestyon peman ak lot pwoblèm yo te espere Federasyon Foutbol Jamayik la tapral adrese.
Deklarasyon an di: "Plizyè fwa, nou chita pale ak federasyon an pou eksprime ak tout respè kè sote nou genyen pa rapo ak mank planifikasyon, transpotasyon, akomodasyon, kondisyon antrenman, konpansasyon, kominikasyon, nutrisyon ak aksesibilite a resous pwopis yo. Nou patisipe nan plizyè evenman tou, san nou pa janm resevwa konpansasyon yo te pwomèt nou lè nou te siyen kontra."
Deklarasyon an di responsab yo te di jwè yo ke yo tapral reponn yo vit e prese men ke sa pat janm fèt. Federasyon Jamayikèn nan pa reponn demann Associated Press fè pou komantè.
FIFA bay tou le 32 ekip kap patisipe nan Mondyal la lajan pou prepare ak yon pousantaj lajan prim nan. Se federasyon an ki resevwa lajan sa a.
Philipps-Brower di lap chache pi bon mwayen pou l distribye lajan li kotize a epi depanse l sou bagay yo pi bezwen.
Jamayik ap jwe sèlman nan dezyèm Koup di Mond li. Premye match li se va 23 Jiyè kont La Frans.
Reggae Girlz yo gen Brezil ak Panama tou nan gwoup yo a, ke Ostrali ap oganize ansanm ak La Nouvèl Zeland.
Reggae Girlz yo ap goumen depi lontan ak koze finansman an, e yo te konte nan pase a sou Cedella Marley, pitit fi mizisyen lejandè reggae Bob Marley a pou kotize lajan pou yo epi jwenn sponso.
Jwèz yo di nan yon deklarasyon: "Nou espere ke atravè itilizasyon platfom nou yo, nou ka eksprime reyalite sityasyon nou e ke jefo nou yo ap resipwok. Nou espere ap gen chanjman sistematik san pèdi tan nan mitan federasyon nou e ke moun ki nan pozisyon lidèship yo va pwoteje entegrite foutbol feminen an."
