Franz Beckenbauer, foutbolè ak antrenè Alman renome ki ede peyi li ranpòte Mondyal Foutbòl la mouri a laj de 78 an.
Fanmi Beckenbauer pibliye yon deklarasyon ke yo voye bay ajans nouvel DPA pou di Beckenbauer fè vwal pou peyi san chapo nan dòmi li Dimanch, e ke fanmi li te avè l nan moman an.
Federasyon Foutbòl Almay la di Beckenbauer te "youn pami meyè foutbolè nan mond lan."
Misye se youn nan pèsonaj santral nan domèn foutbòl la nan peyi Almay.
Li te kapitèn ekip Almay de Lwès la ki te ranpòte Mondyal la an 1974.
Li te travay kòm antrenè ekip nasyonal la nan Mondyal ane 1990 la kote ekip la te ranpòte la viktwa sou Ajantin.
Pandan ane ki pase yo, ansyen foutbolè Bayern Munich la te soufri ak plizyè pwoblèm sante.
