Administrasyon Biden nan pa envite gouvènman Venezyela ak Nikaragwa asiste Somè Dèz Amerik yo mwa pwochen an, dapre sa yon responsab Depatmand d'Eta deklare Jedi. Li fè deklarasyon sa a nan moman kèk lidè rejyonal menase pou yo boyokote rankont emisferik la ki tap yon wont pou Etazini.
Kevin O'Reilly, kowodonatè somè a di se Lamezonblanch ki va detèmine si li pral envite Kiba nan rankont la, ki fikse pou 6-10 Jyen nan vil Los Angeles. Sepandan li di yo deja envite militan sosyete sivil Kiben an nan somè a.
Prezidan Kiben an, Miguel Dias-Canel pibliye yon mesaj sou kont Twitter li Mèkredi kote li deklare li pap asiste somè a "anba okenn sikonsans" e li akize Washington dèske lap mete "presyon brital" sou lidè toupatou nan rejyon an pou asire tout moun pa enkli.
Responsab administrasyon Biden yo te kouri vit pou anpeche boykotaj kèk lidè te menase fè - pami yo Prezidan Meksiken Andres Manuel Lopez Obrador ki di li pap asiste somè a si yo ekskli Kiba, Venezyela ak Nikaragwa.
Lopez Obrador deklare Jedi li pral pwobableman deside Vandredi si wi ou non li pral asiste somè a.
Kestyon peyi ki pa resevwa envitasyon menase pou'l koze pwoblèm pou somè ke konseye Prezidan Joe Biden yo te espere tapral ofri yon chans pou reafime enfliyans Lèzetazini nan yon rejyon se souvan moun kritike pou di li pa okipe ase.
Pou eseye soulaje kè sote Lopez Obrador eksprime a, Washington konsidere envite yon responsab Kiben asiste kom obsèvatè - dapre moun ki byen ranseye sou kestyon an.
Lè yon sou-komite Sena Ameriken an mande si Etazini te envite yon reprezantan gouvènman Kiben an, O'Reilly te reponn "Se yon desizyon pou Mezonblanch la".
Yon responsab wo plase Depatman d'Eta a te deklare ann Avril ke Kiba, Venezyela ak Nikaragwa pwobableman patapral resevwa envitasyon. Sepandan Lamezonblanch repete plizyè fwa ke li poko pran yon desizyon final sou sa.
Lè senatè yo te mande si okenn reprezantan Prezidan Venezyelyen Nicolas Maduro resevwa envitasyon, O'Reilly reponn "Absoliman pa. Nou pa rekonèt yo kom gouvènman souvren."
Etazini ak plizyè lot peyi rekonèt lidè opozisyon Juan Guaido kom prezidan lejitim Venezyela e yo rejte Maduro, ki se yon Sosyalis e yo akize'l dèske li te fè koken pou ranpote eleksyon 2018 la.
O'Reilly di kestyon pou konnen si yo pral envite Guaido nan plas Maduro se "desizyon Lamezonblanch".
Lè yo mande'l si Prezidan Nikaragweyen Daniel Ortega resevwa envitasyon, O'Reilly reponn "Non."
Ortega, yon ansyen geriya Maksis ranpote yon 4èm manda youn apre lot nan mwad Novanm nan, apre li te lage tout rival politik li yo nan prizon. Semèn pase a misye deklare li "pa enterese" nan asiste rankont o somè a.
