Gouvènman Ameriken an ap achte plis vaksen kont varyol senj nan moman yon epidemi entènasyonal ki fè anpil moun sezi kontinye ap ogmante.
Etazini idantifye 45 ka varyol senj la nan 15 eta epi nan vil Washington. Gen plis pase 1,300 ka ki detekte nan 30 peyi andeyo Afrik kote maladi a andemik (savledi se yon maladi yo jwenn regilyeman nan ko moun ki viv nan yon rejyon patikilye).
Otorite yo di risk pou pèp ameriken an pa anpil poukounyea men yap pran mezi prekosyon pou asire mezi medikal deja an plas pou kontre pwoblèm nan nan moman yap detekte plis ka.
Gouvènman Ameriken an gen 72,000 doz vaksen e li pral achte yon lot 300,000 pandan semèn kap vini yo.
Vandredi, gouvènman an te anonse li te komande yon demi milyon lot doz ke li pral livre pi ta ane sa a.
