SAN PEDRO SULA, HONDURAS —
Yon gwoup 600 migran ki gen espwa rive Ozetazini fòme yon karavàn nan nò peyi Ondiras.
Pami yo gen jèn gason fanm ak timoun. Yo te rasanble nan yon stasyon bis nan San Pedro Sula nan nwit la, e yo derape anvan solèy leve. Premye etap yo se frontyè Guatemala.
Pi fò pami manm karavàn sa a se moun Nikaragwa, Ondiras ak Kiba. Gen gwoup konsa kap vwayaje ansanm ak espwa yap gen plis sekirite epi lap pi bon mache pou yo olye yo eseye peye kontrebandye yo oubyen pran wout la poukont yo.
Plizyè pami yo eksprime espwa gouvènman lokal yo pral kite yo pase. Men gen karavàn konsa ki echwe paske yo swa kraze oubyen otorite yo bloke yo.
