Pòtpawòl Depatman Deta ameriken an, Ned Price, fè konnen otorite yo nan anbasad amerikèn nan Moskou te vizite basketèz amerikèn Brittney Griner nan yon prizon ris e, daprè yo, li nan bon kondisyon sante.
Griner, ki gen 31 lane, te tonbe anba men lapolis nan mwa fevriye a nan Ayewopò Entènasyonal Sheremetyevo a nan Moskou nan yon vòl New York-Moukou. Aprè otorite yo te fin fouye valiz li, yo fè konnen yo te jwenn kanabis ilegal ki te vlope nan divès pòch CD. Si lajistis jwenn li koupab, li ka pran jiska10 zan prizon.
Brittney Griner, ki jwe baskètbòl nan Larisi pandan poz sezon regilye a, pataje yon kacho ak 2 lòt prizonye. Otorite yo fè l konnen li ka rete nan prizon an jiska 19 me pwochen annatandan ankèt la fini.
Pi bone nan mwa sa a, Sekretè Deta ameriken an, Antony Blinken, te pale sou dosye a:
“Pa tèlman gen anpil bagay mwen ka di etandone se yon afè prive. Lè yo mete yon ameriken nan prizon kèlkeswa kote a nan lemond, natirèlman nou toujou pare pou n ba li tout asistans posib; sa valab tou pou Larisi. Nou gen yon ekip diplomat k ap travay sou ka kèk lòt Ameriken ki nan prizon nan Larisi. N ap fè tout sa k posib pou n wè si yo otorite yo rekonèt e respekte dwa yo.”
Kèk enfòmasyon ki nan repòtaj sa a sòti nan Reuters.
