Yon jij pibliye yon òdonans restriktiv pou vedèt Ricky Martin dapre sa lapolis fè konnen Samdi.
Jij la siyen òdonans depi Vandredi, e otorite yo t'al vizite yon katye boujwa ki rele Dorado ki sitye sou kòt nò peyi a kote mizisyen an abite pou ba li dokiman an, pòt pawòl lapolis Axel Valencia di Associated Press.
"Jiskounyea nou poko rive jwenn misye," Valencia deklare.
Piblisis Martin an pat reponn mesaj AP voye ba li pou kòmante.
Li poko klè kiyès ki mande òdonans la. Valencia di li paka bay okenn lot detay paske òdonans la pibliye anba lwa Pòtoriko ki gen pou wè ak vyolans domisil.
El Vocero, yon jounal Pòtoriken, rapòte ke òdonans la di Martin ak moun ki nomen nan dokiman an te ann afè pandan 7 mwa. Rapò a di lòd la deklare yo te kase sa gen 2 mwa desa, men moun nan di Martin pa aksepte separasyon an e ke misye chita ap wode bò kay ex-menaj la omwens 3 fwa deja.
"Moun ki mande òdonans la gen kè sote pou sekirite li," El Vocero rapòte. Jounal la di se sa ki ekri nan òdonans restriktiv la.
AP pa jwenn kopi òdonans la.
Valencia di òdonans la entèdi Martin kontakte ni rele moun nan e ke yo jij va detèrmine pi ta si pral gen yon odisyon pou deside si òdonans la pral rete an plas oubyen si yap leve li. Li ajoute d'abitid òdonans sa yo valab pou owmens yon mwa.
Valencia fè remake moun ki mande pou yo pibliye òdonans la pa kontakte lapolis, sa ki ta lakoz avoka gouvènman an antre nan koze a pou detèrmine si gen ase prèv pou akize Martin ofisyèlman. Moun nan fè demann nan devan tribinal la dirèkteman li di.
Enfomasyon pou repotaj sa a soti nan Associated Press
