Sekretè Jeneral Nasyon Zini an, Ban Ki-moon, deklare li genyen anpil kè-sote devan resesyon mondyal la ki lakoz peyi rich yo koupe sou lajan yo te konn bay pou lit kont maladi SIDA a. Mesye Ban pale konsa pa satelit depi New York nan okazyon ouvèti 18èm konferans entènasyonal SIDA a k ap dewoule nan vil Vyèn nan peyi Lotrich. Nimewo 1 Nasyon Zini an ajoute li pè pou pwogrè ki fèt nan lit kont maladi a pa pèdi akoz lajan responsab yo pa resevwa.
Apre mesye Ban, delege yo te tande Chèf biwo Nasyon Zini ki akipe l de zafè SIDA, Michele Sudibe , ki anonse yon nouvo pwogram pou senplifye fason pou yo trete maladi a. Nouvo pwogram sa a, ki rele 2.0, pèmèt yo redui sou kantite lajan moun depanse nan medikaman e li fè l pi fasil pou malad yo ka pran dòz medikaman yo. Direktè Egzekitif Fon Mondyal pou lit kont SIDA a, Michel Kazatchkine, di Fon an bezwen anviwon 20 milya dola pou reyalizasyon nouvo pwogram li gen pou aplike soti kounye la rive nan ane 2013 pou yo ka konsève pwogrè yo.
Pami anviwon 20 mil moun k ap patisipe nan gwo reyinyon anyèl sa a, genyen spesyalis, chèchè, sideyen, manm asosyasyon, e gen tou yon gwoup selebrite --pami yo genyen ansyen prezidan ameriken Bill Clinton ak ansyen vedèt tenis alman Boris Becker k ap eseye kolekte plis pase yon milyon dola pou kanpay kont VIH la, swa viris ki bay maladi Sida a.
Pou plis detay sou 18èm konferans anyèl sou SIDA , koute yon repòtaj avèk Marie Luce Pierre, anvwaye espesyal Sèvis Kreyòl la nan vil Vyèn, peyi Lotrich.
Klike sou ikòn MP3 ki anwo e adwat atik sa a pou w koute repòtaj Marie Luce Pierre
