Prezidan Repiblik Dominiken, Luis Abinader, deklare li pral rankontre Sekretè Jeneral Nasyonzuni an, Antonio Guterres Mekredi pou diskite sou yon apèl yon ekspè LONU lanse pou kite asistans imanitè travèse fwontyè a ak Ayiti ki fèmen kounyea.
Abinader di li pa resevwa yon demann ofisyèl pou fè sa e ke li pral bezwen plis detay, apre ekspè LONU William O'Neill te di sispansyon pwodui premye nesesite tankou manje ak medikaman akoz fèmti fwontyè a ap gen konsekans grav pou Ayiti.
Abinader, kap chache re-eli prezidan nan eleksyon ki pwograme pou Me 2024, anonse fèmti total fwontyè ak Ayiti a Jedi, akoz konstriksyon yon kanal tou pre rivyè Masak la ke 2 peyi yo pataje. Abinader di konstriksyon sa a vyole yon trete Ayiti ak Repiblik Dominikèn te siyen an 1929.
Repiblik Dominikèn di se ajan non-gouvènmantal kap konstwi kanal la, men li lanse apèl bay gouvènman Ayisyen an - kap eseye jere zak vyolans gang yo ak yon kriz imanitè ki vinn agrave - pou mete yon ola nan konstriksyon an.
Ayiti kondane fèmti fwontyè a e li mande Repiblik Dominikèn pou l pwoteje sitwayen Ayisyen kap viv lakay li. Sen Domeng depote plizyè douzèn milye Ayisyen ki te kouri kite Ayiti akoz kriz yo, malgre LONU kritike l plizyè fwa epi mande l pa fè sa.
Sen Domeng di li pap reprann negosyasyon ak Ayiti sou koze fwontyè a toutotan konstriksyon kanal la pa rete, e ke li gen entansyon bati 2 baraj ki taka afekte yon fasyon "siyifikatif" peyi d Ayiti, si trete a pa aktif.
