Nan yon kominike li pibliye sou rezo yo, ayè lendi a, Medsen San Fwontyè fè konnen sant Site Solèy la pran swen 148 moun ki trape viris kolera a.
Depi 15 fevriye, ekip Medsen San Fwontyè konstate yon ogmatasyon ka kolera yo an Ayiti. Pou sèlman jounen 6 mas 2025 la, Inite tretman kolera Site Solèy la te resevwa 19 pasyan ki gen maladi a.
Òganizasyon imanitè a eksplike lapli k ap tonbe dènye jou sa yo, ki ka inonde sistèm dlo ak asenisman yo, vin lakòz "kondisyon ijyèn yo vin pi malouk epi ogmante risk pou kolera gaye pi vit".
Medsen San Fwontyè raple maladi kolera reprezante yon danje pou Ayiti e li pwofite fè sonje jan li enpòtan pou popilasyon an toujou gen aksè nan dlo pwòp pou "anpeche kolera gaye".
Dapre MSF, li enpòtan pou lave men nou ak dlo pwòp chak fwa nou fin fè bezwen nou, epi lave men nou avan nou manje.
