Sekretè Sekirite Nasyonal Kristi Noem deklare administrasyon Trump la anile pwoteksyon administrasyon Biden nan te deside pwolonje anvan fen manda li pou pwoteje 600,000 Venezyelyen kont depotasyon.
Noem di Mèkredi pandan yon entèvyou ak pwogram "Fox and Friends" ke li ranvèse desizyon predesesè li, Alejandro Mayorkas te pran pou pwolonje TPS (Stati Pwoteje Tanporè) pou plis pase yon mwatye milyon Venezyelyen.
Mezi a antre an aplikasyon tou suit.
TPS bay moun ki genyen l otorite legal pou rete Ozetazini men li pa ba yo posibilite pou yo vinn sitwayen Ameriken a lon tèm.
Yo depann de renouvèlman gouvènman an lè stati yo ekspire. Kritik yo di apre yon tan renouvèlman stati a vin otomatik, kèlkeswa sak ap pase nan peyi natal moun sa yo.
