Mwayen Oryan
3 Otaj Rive Izrayèl Pandan Seselfe a Franchi Premye Etap li
3 otaj Hamas te kenbe nan Gaza tounen Izrayèl nan premye defi seselfe frajil ant Hamas ak Izrayèl la.
Otaj yo se: Romi Gonen, 24 an ke yo te kidnape pandan festival mizik Nova a, Emily Damari 28 an, ak Doron Steinbrecher, 31 an ke yo te kidnape nan Kibbutz Kfar Aza.
Pi ta Dimanch, Izrayèl sipoze libere apepre 90 prizonye Palestinyen.
Antant ki siyen an gen ladann liberasyon o fu e a mezi 33 otaj pandan 6 semèn kap vini yo.
An echanj, Izrayèl pral lage prèske 2,000 prizonye Palestinyen ak Palestinyen nan Gaza ke yo te arete.
Seselfe a ogmante espwa dèske yap kapab mete fen nan lagè a kap dewoule depi 15 mwa.
See all News Updates of the Day
Lame Izrayelyen Anonse 7 Otaj ki Libere yo Rive an Izrayèl
Lame izrayelyèn nan anonse jedi sèt otaj ki te libere nan mitan jounen an sou fwontyè Gaza, pami yo senk sitwayen Tayland, rive ann Izrayèl kote sòlda li yo ap pran swen yo, dapre yon kominike.
"Sèt otaj yo libere, yo travèse fwontyè a pou antre sou teritwa Izrayèl, ak akonpayman fòs lame a epi Shin Bet (sekirite entèn), " dapre deklarasyon an.
Yo "aktyèlman sou wout pou ale nan yon premye sant resepsyon nan sid Izrayèl," dapre menm sous la, ki konfime idantite de Izrayelyen yo ak senk Taylandè yo.
Lidè Rebèl ki te Chavire Prezidan Siri a, Bashar Assad, Nonmen Kòm Prezidan Pwovizwa Peyi a
DAMAS, SIRI (AP) — Gwoup Siryen ki te chavire Prezidan Bashar Assad mwa pase a nonmen yon ansyen lidè rebèl islamis kòm prezidan pwovizwa peyi a, nan yon efò pou montre inite pandan yo ap fè fas ak gwo defi pou rebati Siri apre prèske 14 zan gè sivil.
Mèkredi, ansyen rebèl yo rejte tou konstitisyon Siri te adopte pandan rèy Assad la, epi yo deklare yon nouvo konstitisyon pral ekri anvan lontan.
Nominasyon Ahmad al-Sharaa, ki te avan sa alye ak al-Qaida, kòm prezidan Siri “pandan faz tranzisyon an,” fèt apre yon reyinyon gwoupman ansyen rebèl yo nan Damas, kapital Siri.
Netanyahu di Trump Envite l Washington
Premye Minis Izrayelyen an Benjamin Netanyahu di Prezidan Donald Trump envite l nan Lamezonblanch 4 Fevriye.
Se pral premye fè Netanyahu tounen premye lidè etranje ki vizit Washington anba dezyèm manda Trump la.
Netanyahu anonse plan li pou vizit la Madi.
Nouvèl la tonbe nan moman Etazini ap presire Izrayèl ak Hamas pou yo kontinye respekte seselfe ki kanpe konfli Gaza a ki dire 15 mwa.
Nan Gaza, foul Palestinyen ki te oblije kouri kite kay yo tap pran chimen difisil pou tounen lakay yo nan no a pou yon dezyèm jounen Madi. Pandansetan, seselfe frajil la toujou an plas.
Izrayèl Anonse Lanmò 8 nan Otaj yo ki Te Dwe Jwenn Liberasyon yo Nan Premye Faz Trèv la
Lendi, pòtpawòl gouvènman Izraelyen David Mencer di 8 nan otaj ki te pwograme pou jwenn liberasyon yo nan premye faz akò lapè a ant Izrayèl ak Hamas nan Gaza mouri.
Ofisyèl la te di nan yon nòt pou laprès: " Nou te enfòme fanmi yo sou sitiyasyon pwòch yo ki mouri".
Sa vle di nan 26 otaj ki gen pou retounen nan peyi yo nan premye faz akò a, se sèlman 18 ki vivan toujou.
Liban : Kout Zam lame Izrayelyen an Lakòz yon Moun Mouri nan Sid Peyi a
Ministè Sante peyi Liban fè konnen kout zam lame izrayelyen an touye yon moun epi blese sèt lòt lendi nan sid peyi a, yon jou apre yo te pwolonje trèv nan lagè ant Izrayèl ak Hezbollah a.
"Atak lènmi izrayelyen yo kont sitwayen ki t ap eseye retounen nan vilaj yo ki toujou anba okipasyon lakòz yon moun mouri epi sèt lòt blese, pami yo yon timoun," dapre sa ministè a presize nan yon kominike.