Kore di Nò fè konnen dènye esè zam li fè a sete pou teste yon nouvo misil ipèsonik pòte entèmedyè ki kapab frape sib nan oseyan Pasifik la. Lidè Kim Jong Un sèmante pou l kontinye ogmante koleksyon zam nikleyè li a pou kontre rival li yo.
Nouvèl la tonbe Madi, yon jou apre lame Kore di Sid la te detekte lansman an.
Kore di Nò te devwale plizyè sistèm zam ane pase a ki gen kapasite pou sible peyi vwazen li yo epitou Etazini. Pami zam sa yo gen misil balistik entèkontinantal. Gen gwo kè sote dèske kapasite militè peyi sa a taka vinn pi pèfeksyone gras ak transfè teknoloji Larisi. Kore di Nò ak Larisi kole tèt ansanm nan lagè Ikrèn nan.
Kim reitere jefò nikleyè li yo gen kòm bi pou kontre menas fòs ostil yo poze pou peyi l men li pa site dirèkteman Etazini.
