Sipèsta ayisyèn nan ki sou dezyèm sezon li ak Lyon, fè yon dekabès e reyalize yon bèl show nan estad Tre Fontane nan peyi Itali pou bat ekip lokal la.
Corventina ki te pase 2 premye match nan lig chanpyon yo san l patka jwenn wout kan an, repran gou nan fè gòl nan pi gwo konpetisyon sou kontinan ewopeyen an.
Ak kostim bitez li sou li, jeni ayisyen te ouvri eskò a pou Lyon an nan 36è minit match la ak yon bèl "Reprise de volée" nan sifas reparasyon an.
6 minit apre, Grenadyè ta pral make yon mèvèy gòl. Apre li rekipere balon nan wonn sant lan, Corventina remake gadyen AS Roma pa anba kan l, tante yon lòb pou make youn nan pi bèl gòl nan karyè l.
Yon gòl sansyasyonèl, yon reyalizasyon eksepsyonèl, yon mèvèy gòl ki montre tout kalite jwez ayisyèn nan ki ap antre pi fon toujou nan lejann foubòl ayisyen an.
Lyon ak Melchie Dumornay kase met nan men As Roma epi siyen yon 3è viktwa nan lig chanpyon yo pou l konsève tèt klasman an avèk 9 pwen sou 9.
Grenadyè ap retounen sou teren ankò, samdi ki ap vini la kote ekip Lyon an pral jwe kont Saint Étienne nan D1 Arkema a.
N ap raple Corventina fè 5 gòl nan chanpyona Lafrans lan e li fè pati pi bon bitez Fenottes yo nan D1 Arkema a
