Etazini ap prepare pou transfè pouvwa a apre Prezidan Joe Biden felisite prezidan-eli Donald Trump pou viktwa li epi Vis Prezidan Kamala Harris konsede defèt li.
Vis Prezidan Kamala Harris konsede defèt li devan Prezidan-eli Donald Trump nan yon diskou Mèkredi apremidi nan Inivèsite Howard. Se la li tal lekol e se la li te oganize fèt pou suiv dewoulman eleksyon an.
Harris, pa tankou Trump, te pran angajman sa gen plizyè semèn desa pou l respekte rezilta eleksyon an. Li te di sa fè pati prensip fondamantal demokrasi Amerikèn nan.
"Nou dwe lwayote nou pa pou yon prezidan ni yon pati men pito Konstitisyon Etazini. E lwayote konsyans nou ak Bondye nou. Se la alejans mwen ye e map di nou malgre mwen konsede nan eleksyon sa a mwen pa konsede batay ki te bay kanpay sa a jarèt."
Pi bonè nan jounen an, Harris te rele Trump pou felisite l epi diskite enpotans yon transfè pasifik pouvwa a epitou pou l prezidan tout Ameriken dapre sa kanpay li fè konnen.
Kanpay Trump la di prezidan eli-a felisite Harris pou fos li, pwofesyonalism ak tenasite li pandan kanpay la. Tou le 2 lidè yo te dako sou enpotans inifye peyi a.
Lamezonblanch di Prezidan Joe Biden rele tou le 2 kandida yo. Li diskite tranzisyon an ak rezilta eleksyon an nan yon diskou anvan midi Jedi.
Pandan diskou li, Harris te eseye rekonfote patizan li yo ak anplwaye kanpay li.
" Se sèlman lè fè nwè ke ou ka wè zetwal yo. mwen konnen anpil moun santi nap antre nan yon epok fènwè men pou benefis tout moun mwen espere se pa le ka. Men Ameriken si nap antre nan fènwè eben ann eklere syèl la ak yon milya zetwal briyan. Limyè optimism, la fwa, verite ak sèvis."
Diskou Harris la make yon moman ekstraodinè ki raple 2016.
Lè yon lot kandida, Hillary Clinton te konsede defèt li devan Trump.
2 mil patizan Harris te rete apre minui jounen eleksyon Madi a pou suiv. Anbyans la te vinn de plizanpli sonb apre Trump te ranpote la viktwa nan divès eta.
Pandan yo tap suiv diskou Harris yo yo te emosyone.
Caitlin Gaulthier, Patizan Harris:
"Mwen tap kriye maten an. M kite miting la ye swa m tap kriye. Kounyea mwen gen espwa. Mwen santi m fre. Chimen ki devan nou ap long men m pa santi se fen an. "
Jonathan Burton, Patizan Harris:
"Li banou yon ti kras espwa pou n kontinye travay pou amelyore tèt nou kominote nou epi konsantre nou. Mwen kontan li fini konsa. "
Dita Bargava, Patizan Harris:
" Pep la pale. Fok nou repskete sa. Se yon demokrasi e fok nou kontinye goumen."
Trump ranpote 292 vwa elektoral konpare ak 224 pou Harris. Li te deklare viktwa li bone Mekredi maten epi remesye patizan li yo.
"Yo te soti tout kote, Menm sendika, sak pa manm sendika, nwa latino, azyatik arab ak mizilman. Nou te gen tout moun e sete yon bel bagay. Yon realiyman istorik. "
Diskou konsesyon Harris la mete fen nan yon kanpay brid sou kou ki te tanmen apre ke Biden te rale ko li soti nan kous la nan mwad Jyen.
