Quincy Jones mouri a laj de 91 an. Piblisis li di li mouri Dimanch swa lakay li nan Los Angeles, Kalifoni.
Pandan karyè mizikal li, kote li te fè listwa, li te travay ak atis tankou Michael Jackson, Frank Sinatra epi Ray Charles. Se Jones ki te pwodui plak "Thriller" Michael Jackson nan, yon disk ki tabli nouvo rekò mondyal.
Jones pat fini lekòl kote li tap etidye mizik men sa pat anpeche li ranpòte anpil siksè nan Hollywood. Li te youn pami premye responsab Nwa vil la.
Pandan 60 an ki pase yo, li te difisil pou jwenn yon moun nan endistri mizikal, televizyon ak sinema ki pat gen yon koneksyon kèlkonk ak Jones.
Misye te gen zanmi ki prezidan ak diyitè, epitou vedèt sinema, mizisyen, filantwòp ak lidè komèsyal.
