"Gang yo kontinye ap kraze brize an Ayiti. Anpil kote nan kapital la toujou ap sibi atak", Nazyonzini rapòte.
"Anviwon 85% zòn metwopolitèn Pòtoprens lan sou lobedyans gang yo", souliye Nasyonzini ki fè konnen gang yo kontinye ap minen tranzisyon an an Ayiti.
Depi 17 oktòb, nèg ak gwo zam fanfwa lanse yon seri atak nan Solino. Plizyè kay boule rapyetè, yon fanm ansent tonbe anba bal bandi, plis pase 20 mil moun kouri kite kay yo...
Yon sitiyason ki simen laperèz nan mitan popilasyon ki pa konn ki se pou yo rele.
"Mwen santi m enpisan", deklare Dorcevah, yon abitan Solino ki te oblije met vwal nan do l ak tout fanmi l, pou l pase anba men gang yo.
"Mwen gen madanm ak pitit, m paka pwoteje paske sa k ap pase a pa yon bagay òdinè. Nap pale de nèg ak zam. Yo ka fè kadejak sou madanm mwen, touye timoun mwen yo", deklare Dorcevah nan mikwo The Guardian.
Abitan Solino a ajoute : "chak jou, chak mwa, chak ane, gang yo vin pi pisan."
