Apre viktwa li (5-3), lendi, kont ekip Aruba a, seleksyon nasyonal Ayiti, ki gen 12 pwen nan klasman gwoup C a, jis bezwen yon gren pwen pou ofisyalize plas li nan Gold Cup 2025 lan.
Ayiti ki anregistre 4 viktwa nan 4 premye match li nan lig nasyon Concacaf yo, ap kòmande gwoup C a avèk 12 pwen sou 12 posib, lwen devan ekip Potoriko ak Sint Maarten ki gen yo chak 6 pwen.
Yon match nil nan pwochen jounen an, ap sifi pou Timesye Sébastien Migné yo, pou atenn objektif yo: kalifikasyon pou Gold Cup.
Grenadye yo ap jwe 15 novanm kont ekip Sint Maarten nan avan y al twoke kòn yo ak Pòtoriken yo twa jou apre.
Yon match nil nan 2 match sa yo ap voye Ayiti nan Gold Cup la.
N ap raple Grenadye yo te bat (4-1) ekip Pòtoriko a nan premye jounen lig nasyon Concacaf yo, avan yo te woule anba gòl (6-0) ekip Sint Maarten an, nan 2e jounen an.
Nan doub konfwontasyon yo kont ekip Aruba, seleksyon Ayiti a te domine Aruba (3-1) e (5-3).
Nan 4 match li jwen nan lig nasyon Concacaf yo, Ayiti bay 18 gòl e li pran 5.
