Venezyela
Gwo Tansyon Diplomatik ant Madrid ak Caracas
Gwo Tansyon diplomatik ant Madrid ak Caracas, ki jedi raple anbasadè li ann Espay pou konsiltasyon kèk èdtan apre prezidan gouvènman an, Pedro Sanchez, te resevwa opozan venezuelyen an Edmundo Gonzalez Urrutia, ki te pran azil nan Madrid depi dimanch.
An repons a yon deklarasyon ke Minis Defans Panyòl la, Margarita Robles te fè, kote li te dekri gouvènman Nicolas Maduro kòm yon "diktati", Venezyela "deside raple anbasadè Venezyelyen an" Gladys Gutierrez "pou konsiltasyon", dapre sa Minis Afè Etranjè Venezyelyen an. Yvan Gil te anonse sou rezo sosyo.
Caracas te konvoke tou anbasadè Espayòl la nan Venezyela, Ramon Santos Martinez, pou parèt nan Ministè a vandredi.
Jedi, Minis Defans Espayòl la, Margarita Robles, te eksprime solidarite ak "gason ak fanm nan Venezyela ki te oblije kite peyi yo" akòz "diktati".
Yon Kòmantè ke Mesye Gil te dekri kòm "ensolan ak grosye", li di ke pawòl piman bouk sa yo "temwaye yon deteryorasyon" nan relasyon bilateral 2 peyi yo.
Chèf gouvènman espayòl la Pedro Sanchez te resevwa Jedi Edmundo González Urrutia, kandida opozisyon an ki pèdi eleksyon an dapre rezilta ofisyèl yo men te kriye koken.
Rezilta ofisyèl yo di Maduro genyen eleksyon an sa pral fè twazyèm manda aktyèl prezidan an .
"Mwen byen akeyi li," se sa Mesye Sanchez te deklare, nan yon mesaj ke li pibliye sou X sou Mesye Gonzalez Urrutia ki te rive nan Madrid dimanch.
Misye Sanchez asire ke Espay kontinye "travay pou demokrasi, dyalòg ak dwa fondamantal pèp la nan Venezyela."
Espay, menm jan ak tout eta manm Inyon Ewopeyen an, ap mande piblikasyon rezilta chak grenn vòt ki te fèt nan biwo vòt yo.
Konsèy Elektoral Nasyonal la (CNE) pwoklame Prezidan Nicolas Maduro venkè eleksyon sa a, ak 52% vòt yo.
Men, opozisyon an konteste rezilta sa a ki asire, e yo fè konnen sou baz done yo genyen, ke kandida yo Edmundo Gonzalez Urrutia te jwenn plis pase 60% nan vòt yo.
Nan absans rezilta konplè, peyi Inyon Ewopeyen yo te refize rekonèt rezilta ofisyèl yo.
Etazini, ki deside rekonèt Misye Gonzalez Urrutia kòm prezidan eli, e anonse sanksyon jedi kont 16 moun ki pwòch Nicolas Maduro, ki fè konnen yo te "antrave" dewoulman eleksyon prezidansyèl la nan mwa Jiyè. 28.
Pami yo gen lidè CNE a ak majistra ki gen ladan prezidan Kou Siprèm lan ki valide re-eleksyon Mesye Maduro a, ak pwosekitè a ki te pibliye yon manda arestasyon kont kandida opozisyon an Edmundo Gonzalez Urrutia.
Caracas te rejte imedyatman "ak pi gwo detèminasyon" mezi yo te jije "ilejitim ak ilegal" epi konsidere kòm yon nouvo "agresyon" ke Washington te fè sou yo.
See all News Updates of the Day
Venezyela: Opozan Luis Somaza jwenn arestasyon l
Opozan Luis Somaza, youn nan kad pati opozisyon venezyelyen Voluntad Popular, te jwenn arestasyon l mèkredi, daprè sa minis Enteryè Diosdado Cabello te deklare jedi, sa ki konfime yon anons Leopoldo Lopez, lidè pati a epi figi opozisyon an ki an egzil nan peyi Lespay, te fè avan sa.
Minis la, ki dekri M. Somaza kòm yon "teworis", pa bay plis detay sou arestasyon an ni sou rezon yo.
"Arestasyon an te fèt lakay li yè (mèkredi) pa kèk moun ki pa t gen okenn idantifikasyon", se sa M. Lopez te di pandan yon reyinyon vityèl jedi ak jounalis nan Venezyela.
Gen yon "trantèn" manm pati Voluntad Popular (VP) ki kounye a nan prizon, daprè sa M. Lopez ajoute.
Sou X, VP mande "liberasyon prese-prese" M. Somaza epi pibliye yon videyo kote sè li, Valeria Somaza, ap rakonte arestasyon an.
- Serge Michel
Yon Premye Gwoup Imigran Etazini Depòte Rive Venezyela
Yon premye gwoup sitwayen venezyelyen Etazini mete deyò nan peyi a te ateri lendi 10 fevriye a nan aswè nan ayewopò Maiquetia, nan nò Caracas, dapre sa yon jounalis AFP te konstate.
Etazini Ankouraje Peyi yo Resevwa Depòte yo
Etazini voye yon emisè OVeneyela pou l konvenk otorite yo aksepte imigran Venezyelyen k ap viv nan peyi a san dokiman legal.
Venezuela : Chèf Opozisyon an Mande Pou Yo Bòykote Pwochen Eleksyon yo
Lidè opozisyon venezyelyen an, Maria Corina Machado, ki toujou konteste viktwa Nicolas Maduro nan eleksyon prezidansyèl 2024 la, te lanse apèl dimanch pou mande pou yo bòykote eleksyon k ap vini yo nan Venezuela.
"Jiskaske rezilta ki 'bay opozisyon an laviktwa' antre an aplikasyon, li pa apwopriye pou nou patisipe nan eleksyon yo."
Se sa Machado te di nan yon videyo li poste sou rezo sosyal yo anvan eleksyon palmantè, minisipal ak eleksyon pou gouvènè yo.
Nicolas Maduro, ak sipò lame a ak yon administrasyon japwouv, te prete sèman nan mitan mwa janvye a pou yon twazyèm manda 6 zan nan yon seremoni rival li Edmundo Gonzalez Urrutia, ki ann egzil, te dekri kòm yon "koudeta".
Urrutia konsidere tèt li kòm prezidan eli, e li te mande lame a pou l "dezobeyi".
Etazini Voye Jete Re-eleksyon Prezidan Maduro, men li Kenbe yon Sous Finansman Pou Gouvènman l lan
KARAKAS, Venezyela (AP) —An 2022, Mezon Blanch te bay Venezyela yon sous finansman “pou soutni retablisman demokrasi” apre Prezidan Nicolás Maduro te pwomèt pou l travay pou gen yon eleksyon prezidansyèl ouvè, epi li te akòde gwo konpayi ameriken Chevron yon pèmi pou pèmèt li pwodui ak ekspòte petwòl venezyelyen malgre sanksyon yo.
Eleksyon Maduro te pwomèt la pa t ni lib ni jis, epi li te prete sèman mwa sa a pou yon twazyèm manda 6 an, malgre prèv kredib ki montre opozan li te jwenn plis vwa pase li.
Men, sanksyon yo te retire yo toujou ap ede gouvènman an ranpli kès leta. Opozisyon Venezyelyen an di gouvènman Maduro a te fè milya dola nan ekspòtasyon pèmi sa a te rann posib, e li difisil pou gwo otorite ameriken yo eksplike poukisa pèmi an toujou an plas.
Facebook Forum