Yon premye vòl pou depòte migran sot kite Panama bonè jodi madi a nan kad yon nouvo estrateji pou redui kantite moun, pifò nan yo sou wout pou Etazini, ki travèse savann danjere ki konekte Amerik Santral ak Amerik di Sid.
Vòl yo ke Washington finanse, vini mwens ke 2 mwa anvan eleksyon prezidansyèl Etazini an ki pwal fèt an Novanm. Se yon nouvo mwayen pou adrese kesyon migrasyon an, ki moute kòm yon sijè ki domine kous ant ansyen Prezidan Repibliken Donald Trump ak kandida Demokrat Kamala Harris.
Premye vòl la dekole nan vil Panama, kapital la, ak 29 Kolonbyen abò li, ki yo tout gen dosye kriminèl nan peyi pa yo e otorite mete men sou yo apre yo te vin travèse Savann Darien ki konekte Kolonbi ak Panama. Yo te kondi depòte yo al moute abò avyon an ak chenn nan pye yo ak menòt nan ponyèt yo.
