Venezyela
Venezyela: Kolonbi ak Brezil anfavè yon Nouvo Eleksyon Prezidansyèl
Brezil ak Kolonbi pwopoze jedi pou gen yon nouvo eleksyon prezidansyèl nan Venezyela pou peyi a kapab soti nan yon kriz ki la depi rezilta dènye eleksyon fen mwa Jiyè a ke Maduro te genyen, e ke opozisyon an konteste. Opozisyon an rejte pwopozisyon an kote li akize prezidan an kòmkwa li ap "jwe ak lavi dè milyon" Venezyelyen lè li bloke yon "tranzisyon politik" nan peyi a.
Lidè opozisyon an Maria Corina Machado rejte apèl sa yo imedyatman nan entèvyou ak medya Chilyen ak Ajanten. Li di: "Pwopoze pou yo pa konte sa ki te pase nan jou eksyon 28 Jiyè a, pou mwen se derespekte Venezyelyen (...), yo dwe respekte vwa pèp souvren an".
Apre sa nan lannwit, opozisyon an pibliye yon videyo kote li lanse "yon apèl bay Nicolas Maduro: respekte volonte pèp Venezyelyen an, w ap jwe ak lavi dè milyon konpatriyòt!"
"Ekonomi peyi a ap vin pi mal chak jou ki pase san yon solisyon politik, epi trajedi sa a se responsablite w (...) ou dwe respekte volonte pèp la epi pèmèt yon tranzisyon pou rive nan yon gouvènman ki kapab retabli konfyans epi ouvri pòt devlopman ekonomik".
Misye Maduro, ki akize 2 lidè yo k ap viv nan kache depi 2 semenn kòmkwa yo vle fè yon koudeta, deklare: "Konfli yo nan Venezyela (...) dwe jwenn solisyon ant moun Venezyela, ak enstitisyon yo, ak lwa yo, ak Konstitisyon yo a".
Prezidan an, ki te al devan Tribinal Siprèm nan pou "valide" viktwa li a, toujou pa vle reyaji sou deklarasyon ki soti nan peyi etranje yo, li di: "Nou pa pratike diplomasi mikwofòn. Chak prezidan, chak Eta, chak peyi konnen kisa li dwe fè nan zafè entèn lakay li.
See all News Updates of the Day
Venezyela ak Larisi Siyen Akò Militè ak Petwòl
Venezyela ak Larisi te siyen jedi yon seri akò militè, espesyalman nan domèn entèlijans, ansanm ak akò petwòl ki, selon prezidan venezyelyen Nicolas Maduro, simante "chemen koperasyon" ant 2 peyi yo.
"Avek akò epi kontra sa yo nou siyen, nou ap simante epi ranfòse chemen inyon ak koperasyon ant Larisi ak Venezyela pou rès ane kap vini yo, jouk 2030 menm pi lwen," se sa Maduro te di pandan yon seremoni nan palè prezidansyèl la nan Karakas, nan fen yon reyinyon ant delegasyon 2 peyi sa yo ki se pwòch alye.
Vis-prezidan Larisi Dmitri Tchernichenko te anvan sa souliye volonte peyi li pou reponn "konplètman" a "bezwen fòs lame venezyelyen an" nan founi yo "zam ak ekipman militè ki plis sofistike," selon tradiksyon deklarasyon li an pa televizyon piblik venezyelen an.
Pami 17 akò yo, de peyi yo te siyen yon dokiman koperasyon sou "itilizasyon dwòn" ak "kesyon entèlijans ak kont espyonaj".
Sou bò pa li, vis-prezidan venezyelyen Delcy Rodriguez te remèsye prezidan ris Vladimir Poutine pou sipò li nan "ekipman" fòs lame venezyelyem yo e pou koperasyon li nan ede " pwoteje" sou "entegrite teritoryal" ak "souverènte nasyonal" peyi a.
Pati yo te siyen tou akò sou "fòmasyon ak konsèy teknik" nan domèn enèji ansanm ak sou "bay sèvis petwòl ak teknoloji pou rekiperasyon petwòl brit," se sa moderatè reyinyon an te deklare.
Venezyela Raple Anbasadè li nan Brezil pou Konsiltasyon
Venezyela raple anbasadè li a nan Brezil pou konsiltasyon mèkredi, epi li te fè apèl a chaje dafè Brezil la nan Karakas, pandan tansyon an ap ogmante ant de peyi yo apre veto Brezil la sou antre Venezuyela nan gwoup Brics la semenn pase a.
"Nou te deside fè apèl ijan ak anbasadè (venezyelyen an) Manuel Vadell pou konsiltasyon (...) Nou te fè apèl jodi a a chaje dafè (...) Brezil," selon tèks kominike Ministè Afè Etranjè Venezyela a.
"Nou denonse konpòtman irasyonèl diplomat Brezilyen yo ki, malgre apwobasyon lòt manm Brics yo, te adopte yon politik blokaj," tèks la kontinye.
Karakas voye jete tou "ak tout fòs li tout entèferans ki ap fèt souvan ak deklarasyon grosye ki soti nan men pòtpawòl gouvènman Brezil la, espesyalman sa yo ki soti nan men konseye espesyal pou Afè Etranjè, Celso Amorim (...) ki konpòte li plis kòm yon mesaje pou enperyalis ameriken an."
Ministè Afè Etranjè Brezilyen an pa gen okenn plan pou pran mezi resipwòk pou kounye a: "Nou pral kontinye evalye" sitiyasyon an, se sa yon fonksyonè nan ministè a ki pa t vle non l site te di bay AFP.
Prezidan Asanble Nasyonal la, Jorge Rodriguez, youn nan moun ki pi pwisan nan pouvwa venezyelyen an, te pwopoze pou deklare M. Amorim "persona non grata", akize li espesyalman pou "enjerans" ak "atitid feblès san parèy li devan plan agresif enperyalis" ameriken an.
Antòtye nan yon kriz ekonomik ki san bout, ki vin pi grav ak sanksyon ameriken, Karakas te vreman swete antre nan Brics pandan somè ki te fèt nan Kazan (Russie) semenn pase a. Malgre sipò Larisi, li te fè fas ak veto Brazilia.
Karakas te reyaji ak fòs sou veto Brezil la vandredi ak yon kominike ki pat mete dlo nan bouch li pou pale de : "agresyon", "jès ostil", "ineksplikab ak imoral".
Prezidan Nicolas Maduro te mande tokay brezilyen li, Lula, pou li pran pozisyon parapò ak ministè afè etranjè Brezil la, ki dapre li se "yon pouvwa anndan pouvwa brezil la depi anpil ane (...) ki toujou konspire kont Venezuela (...) ki mare sosis li ak Depatman Deta ameriken an depi epòk koudeta kont (Prezidan brezilyen) Joao Goulart an 1964."
Venezyela : Volontè Opozisyon an k ap "Defann Vòt yo" Pè Represyon
" Yo ap pwiv nou, yo ap siveye nou” : akize kòm "teyoris" pa otorite yo, "comanditos" yo, ti gwoup volontè opozisyon venezyelyen an ki te kreye pou eleksyon prezidansyèl 28 jiyè a, ap viv nan lapèrèz depi reyeleksyon konteste Nicolas Maduro.
Gwoup sa ki te lanse pandan kanpay la, "comanditos" yo, ki gen 70,000 manm, te gen kòm objektif pou mobilize elektè yo pou vòt la, òganize travay lojistik tankou pote manje oswa dlo pou moun ki ap veye vòt la, oswa transpòte moun ki pral vote nan biwo vòt yo.
Youn nan misyon prensipal yo te se pou rekipere pwosè vèbal nan chak biwo vòt pou jwenn dekont detaye vòt la.
Prezidan Nicolas Maduro te pwoklame kòm gayan eleksyon yo ak 52% vwa pa Konsèy Nasyonal Elektoral (CNE), yo konsidere ki ta kòmkwa anba lòd pouvwa a e ki pa t pibliye pwosè vèbal biwo vòt yo, yo te fè konnen yo viktim pirataj enfòmatik, sa opozisyon an twouve ki pa kredib.
Opozisyon an afime "comanditos" yo te rasanble anviwon 80% nan pwosè vèbal yo, e kandida yo, Edmundo Gonzalez Urrutia, te genyen eleksyon prezidansyèl la ak plis pase 67% nan vòt yo. Ki kounye a twouve l nan mawon nan peyi Lespay akoz manda arestasyon yo mete dèyè l, alòske M. Maduro te fè kwè Madam Machado tou te kite peyi a.
Dapre sous ofisyèl, plis pase 2,400 moun te jwenn arestasyon yo pandan manifestasyon ki te vin apre anons viktwa M. Maduro. Sa te lakòz tou 27 moun mouri, pami yo de manm fòs lòd yo.
Yo akize moun yo te arete yo kòm "teroris", pandan prezidan Maduro te souvan atake "comanditos" yo, li akize yo kòm "kriminèl" ki responsab vyolans ak "tantativ koudeta".
Venezyela Devwale yon Desen Nasrallah sou Yon Mi pou Rann Omaj a Defen Lidè Hezbollah a
Manm kominote Libanè ak Palestinyen nan Venezyela te reyini jedi 17 oktòb la pou devwale yon desen sou yon mi nan Karakas pou rann omaj a defen lidè Hezbollah Sayyed Hassan Nasrallah.
Desen sa a montre drapo Libanè ak Venezyelyen ak figi Nasrallah nan mitan an.
Desen sa an te inogire pa yon mouvman sosyal goch ki makònen ak gouvènman an nan objektif pou ankouraje lapè ak dwa grandèt pèp yo nan mond lan.
Izrayèl te touye Nasrallah nan dat 27 septanm, nan yon atak ayeryen nan yon katye nan sid Beyrout ki te anba kontwòl Hezbollah. Lanmò li te yon souflèt marassa pou Hezbollah alòske gwoup la te deja boulvè akòz ogmantasyon atak Izrayelyen yo. Li t ap dirije Hezbollah depi 1992.
Venezyela: Opozisyon an Mande Pèsonèl Jidisyè pou yo Dezobeyi Lòd ki Vyole Lalwa Pouvwa ta Pase yo
Lidè opozisyon Venezyelyen an, Maria Corina Machado, te mande madi pou otorite nan Ministè Jistis yo pa obeyi lòd pouvwa a ki vyole Konstitisyon an, 2 mwa apre Tribinal Siprèm te valide reyeleksyon Nicolas Maduro ke opozisyon an konteste.
Madam Machado te di nan yon mesaj odyo nan yon emisyon sou rezo sosyal yo "Lè a rive pou tout ofisyèl jidisyè yo reprezante imaj kouraj ak diyite, pa obeyi lòd ki vyole Konstitisyon an epi defann konpatriyòt yo".
Apèl sa a vini yon jou apre Kou Siprèm Jistis la (TSJ) te rejte 2 demann opozisyon an te depoze pou mande TSJ revize desizyon li te pran 22 Out pase a kote yo valide reyeleksyon Mesye Maduro apre vòt 28 jiyè yo.
Li kontinye pou l di "Nou konnen desizyon jidisyè kèk moun pran kont Konstitisyon an ak volonte pèp Venezyelyen an se lave men siye atè".
Opozisyon an, ki reklame viktwa kandida li a Edmundo Gonzalez Urrutia, regilyèman akize tout sistèm jistis la ke yo ta sou lòd moun ki nan pouvwa(Maduro) a.