Otorite Otrichyen yo di tou le 2 sispèk yo nan konplo yo dejwe ki te vize atake spektak vedèt Amerikèn Taylor Swift yo, sanble te pran enspirasyon nan gwoup Eta Islamik la epi al-Qaida.
Yo deklare Jedi ke anketè yo jwenn materyo pou fabrike bonm lakay youn nan sispèk yo.
Otorite yo di youn nan yo konfese dèske li tap planifye pou "touye otan moun ke posib devan arèn nan."
Tout biyè pou 3 konsè Taylor Swift yo te gen tan finn vann alavans. Yo anile yo Mèkredi akoz konplo a, sa ki devaste "Swifties yo" - kidonk fanatik fawouch Taylor Swift yo" toupatou nan mond lan.
Ewald Tatar se oganizate konsè a.
" An jeneral yon desizyon konsa pou anile rive apre kowodinasyon pwoch ak manadjè yo. Sete yon bagay klè. Yon gwo pati desizyon an se manadjè Taylor Swift yo ki pran l. Kestyon si li te nesesè pou anile konsè yo - mwen ka reponn sèlman ak fè yo ke nou tout finn tande kidonk repons mwen se senpman wi."
Anna Maria se yon etidyan Bilgari ki vwayaje Otrich pou spektak Taylor swift la.
" Se yon bagay ki tris ke se nan mond sa a nap viv e ke bagay konsa ap pase. Paske konse sa a ta dwe yon kote sekirize pou tout moun. Kounyea li vinn yon menas. Pesonn pa santi yo an sekirite anko le yap asiste konse konsa. Se sa m panse."
Anpil nan fanatik sa yo te finn depanse plizyè milye euwo pou vwayaje Otrich pou spektak la epi pou rezève chanm otèl pou asiste spektak "Eras Tour" chantez la.
