Mwayen Oryan
Frap Izrayelyen ki te Sible yon Gwo Chabrak Hezbollah Touye yon Moun, Men Pa Militan an
Yon frap Izrayelyen kont banlye sid vil Beirout, kapital Liban Madi, sible sal operasyon gwoup militan Hezbollah a, dapre sa 3 responsab wo plase ajans sekirite peyi Liban di Reuters.
Dapre nouvel yo frap la te sible Muhsin Shukr, ke moun konnen tou kom Fuad Shukr.
Etazini te enpoze sanksyon kont Fuad Shukr nan ane 2015.
Izrayel akize misye deske li responsab pou yon atak ak misil kont morn Golan yo ki touye 12 timoun ak tinedye.
Gen 2 Sous sekirite Libane ki di Reuters misye siviv atak la.
Ajans nouvel Reuters site yon sous sekirite ki di gen yon dam ki mouri epi 7 lot blese nan atak la.
Pandansetan Etazini di li pral kontinye pousuiv diplomasi pou evite konfli ant Izrayel ak Hezbollah a epapiye pi plis.
Pot pawol Vedant Patel di jounalis yo solisyon diplomatik la ta pemet sivil Izrayelyen ak Libane tounen lakay yo epi viv nan lape ak sekirite.
Yon lot kote, Larisi deklare atak Izrayel lanse kont Liban an se yon vyolasyon lwa entenasyonal.
See all News Updates of the Day
Hezbollah Revandike Nouvo Atak sou Sòlda nan Nò Izrayèl
Hezbollah Libanè a te di byen bonè Jedi li te tire misil sou sòlda Izrayelyen yo nan nò Izrayèl, yon ti tan apre li te revandike responsablite pou yon lòt atak sou sòlda Izrayelyen ki deplwaye nan sid peyi Liban.
Nan yon deklarasyon, mouvman pwo Iranyen an te di li te "vize yon rasanbleman fòs lènmi Izrayelyen nan Sa'sa ak yon latriye misil", yo presize frap la te fèt a 11:50 pm lè lokal Mèkredi (9:50). p.m. GMT).
Lokal sa a sitiye nan nò Izrayèl.
Etazini: Lajitis Akize yon Anplwaye Gouvènman Paske l Divilge Dokiman Sekrè
WASHINGTON (AP) — Yo akize yon nonm ki te travay pou gouvènman ameriken an paske li te divilge enfòmasyon sekrè ki te evalye plan avan Izrayèl l te gen pou atake Iran.
Se sa dokiman ki depoze nan tribinal yo Mèkredi a revele.
FBI te arete mesye a, ki te idantifye kòm Asif William Rahman, semenn sa a nan Kanbòdj e li ta dwe parèt devan tribinal pou premye fwa nan Guam.
Li pa imedyatman klè ki ajans federal ki te anplwaye li.
Dokiman yo te montre Izrayèl la te toujou ap deplase mwayen militè pou fè yon frap an repons a atak misil balistik Iran an nan premye oktòb.
Izrayèl te fè yon atak revanj sou plizyè sit nan Iran nan fen mwa oktòb la.
Etazini te fè yon Frap Kont Sib Iranyen yo nan Peyi Siri
Washington - Lame Ameriken an te di Lendi li te fè atak kont 9 sib ki asosye ak gwoup Iranyen nan Siri.
Nan yon deklarasyon, lame ameriken an te di atak yo te fèt sou 2 kote nan peyi Siri e yo te yon repons a plizyè atak sou pèsonèl ameriken nan peyi Siri nan dènye 24 trèdtan yo.
Etazini te detanzantan fè atak kont sib ki gen rapò ak Iran tou nan Irak ak nan Siri. An fevriye, Etazini te lanse atak ayeryen an Irak ak Siri kont plis pase 85 sib ki gen rapò twoup Gad Revolisyonè Islamik Iran an ak milis li apiye a, kòm revanj pou atak mòtèl sou twoup Ameriken yo.
"Frap sa yo pral afebli kapasite gwoup Iranyen ap apiye yo pou planifye ak lanse atak pi devan sou fòs ameriken ak kowalisyon yo," lame ameriken an te di apre dènye frap yo.
Etazini gen 900 twoup nan Siri ak 2,500 kay vwazen yo Irak, nan yon misyon pou konseye ak ede fòs lokal yo k ap eseye anpeche Eta Islamik retounen, ki an 2014 te akapare yon bon pati nan tou de peyi yo, men yo te rive kraze l an apre.
Etazini voye bato ak avyon lagè nan rejyon an depi konfli Izrayèl ak Hamas te eklate nan dat 7 oktòb 2023, pou eseye dekouraje Iran ak gwoup ki apiye Iran patisipe nan konfli a.
Fòs Ameriken yo te ede tou tire pou kraze pwojektil Iran te lanse nan direksyon Izrayèl ane sa a.
Hamas Mande Peyi Arab ak Mizilman yo pou Fòse Izrayèl Sispann ak "Agresyon" li
Mouvman Islamis Palestinyen Hamas la te mande peyi Arab ak Mizilman yo pou yo aplike deklarasyon yo te fè menm jou pandan somè yo nan Riyad pou fòse Izrayèl sispann "agresyon" l yo.
Hamas te ekri "Afimasyon dwa nasyonal pèp nou an, premye ladan yo se kreyasyon yon eta Palestinyen endepandan ak Jerizalèm kòm kapital li, mande efò rapid ak solisyon pratik pou fòse (Izrayèl) sispann agresyon li ak jenosid kont pèp nou an, ”
Fanatik Futbòl Izrayelyen Sibi Atak nan Amsterdam
Otorite Olandè yo deklare jèn jan ki tap sikile sou scooter atake fanatik Izrayelyen lanuit la apre yon match foutbòl nan Amsterdam. Sanble atak sa yo dewoule apre apèl ki pibliye sou rezo sosyal yo ki mande pou yo sible Juif yo.
Facebook Forum