Etazini pa resevwa yon lidè Afriken nan yon vizit deta – ki se vizit nan nivo ki pi wo nan kad pwotokòl diplomatik la - depi apre vizit Prezidan peyi Gana, John Kufuor, an 2008.
Vwayaj la, ke yo te anonse nan mwa Fevriye, te sipoze fèt an menm tan ak deplwayman ann Ayiti premye twoup ki ap soti Kenya yo nan kad yon fòs miltinasyonal ki vize retabli lòd nan peyi Karayib la ke vyolans gang fin ravaje.
Apre plizyè mwa negosyasyon, Nairobi te dakò pran tèt misyon sa a ki te resevwa otorizasyon Konsèy Sekirite Nasyonzini nan mwa Oktòb epi ki te jwenn sipò Washington pou finans ak transpò, pandan Etazini pa vle voye fòs pou akonpaye misyon an.
Gouvènman Kenya a fè silans sou deplwayman sa a ki te pwovoke gwo kritik e ki ap fè fas ak gwo defi legal nan peyi li, men yon premye kontenjan polisye Kenya ta dwe debake nan zile a semèn sa a, dapre sa kèk sous sekirite te di AFP.
Lame Ameriken te anonse nan dat 7 Me ke li te voye "kontraktè sivil, ekipman ak materyèl" nan ayewopò Pòtoprens pou prepare arive fòs sa a.
Pandan li anba kritik, Ruto - ki ap fè efò pou l enpoze Kenya sou sèn entènasyonal la - defann sa li rele yon "misyon imanitè" nan yon peyi, dapre sa li di, ke kolonyalis te ravaje.
Vwayaj li a se pral yon opòtinite pou adrese difikilte ki rete toujou sou kesyon finansman fòs la.
