Aplikasyon TikTok la se pwopriyete konpayi chinwa ByteDance, e gouvènman yo fè konnen yo gen gwo kè sote pou enfòmasyon ke TikTok kolekte yo pa al tonbe nan men otorite chinwa yo.
Koulye a, nan wikenn ki sot pase a, kongrè Etazini vini ak yon nouvo pwojè lwa ki bay ByteDance on delè pou li degaje li “kou mèt Jean Jacques” vann aplikasyon an ak yon konpayi ameriken, oubyen otorite nan peyi a ap mete entèdiksyon kont aplikasyon mobil la sou tèritwa Ameriken an.
Pami peyi ki mete entèdiksyon total sou TikTok nou jwenn Afganistan, End, Nepal ak Somali.
Ostrali, Kanada ak anpil peyi Ewopeyen tankou Bèljik, Dànmak ak Oland entèdi “app” la nan telefòn travay.
Ozetazini, TikTok anba entèdiksyon tou nan aparèy ofisyèl ajans gouvènman yo, nan plizyè eta ameriken, nan Kongrè a ak nan lame.
