Fiti Rèn Angletè a, Kate, anonse Vandredi li gen kansè e lap resevwa chimiyo-terapi.
Li revele kondisyon li nan yon mesaj videyo ke li te anrejistre Mèkredi ke yo difize nan la Grand Bretay Vandredi. Videyo a mete fen nan plizyè semèn spekilasyon sou rezo sosyal yo sou ki kote li te ye ak poukisa yo pa we l - depi ospitalizasyon li nan mwad Janvye a pou yon operasyon nan vant.
"Mwen ta renmen remesye nou tout pèsonèlman pou mesaj sipo yo ak konpreyansyon nou pandan chiriji mwen. Tout fanmi nou an antye fè fas ak yon seri mwa ki difisil anpil. Men ekip doktè mwen yo fantastik yo pran bon swen de mwen e mwen trè rekonesant. Nan mwad Janvye a mwen sibi yon operasyon serye nan vant nan Lond. Nan epok la yo te wè kondisyon mwen pat kansere. Chiriji te byen pase men tès ki fèt apre operasyon an jwenn prezans kansè. Ekip medikal mwen konseye m pou m sibi yon seri tretman prevantiv chimiyoterapi e kounyea mwen nan premye faz tretman sa a. "
Kate di nouvèl la te chokan pou limenm, mari l ak timoun yo e li mande piblik la pou ba li "tan, espas ak respè pou vi prive li" pandan lap resevwa tretman yon kansè li pa spesifye.
Li fè konnen li byen, lap reprann fos chak jou e lap konsantre sou bagay ki pral ede l geri.
Pèsonn pat wè Kate, ki gen 42 zan depi fèt nwèl la - jiskaske yon videyo te pibliye semèn sa a ki montre l ak mari li Prens William ki eritye twon nan. Nan videyo a yo tap fe acha nan yon magazen ki sitye sou yon bitasyon tou pre lakay yo nan Windsor.
