Gouvènman Venezyelyen an resevwa yon peman $500 milyon nan men Ayiti pou pwovizyon petwòl nan kad yon akò rejyonal, dapre yon deklarasyon Ministè Kominikasyon ak Enfòmasyon Venezyela pibliye.
Anba gouvènman defen Prezidan Hugo Chavez la, Venezyela te voye plizyè milyon barik petwòl kri ak gazolin bay Ayiti nan kad yon akò ki te bay peyi Karayibeyen yo fleksibilite pou yo peye pou kagezon sa yo. Pi ta anpil nan peyi sa yo, pami yo Ayiti, te goumen pou re-peye dèt yo. Prezidan Nicolas Maduro di li vle reprann akò a.
Ajans nouvèl Ameriken Bloomberg te rapòte nouvèl sou peman Ayiti a an premye. Bloomberg di Ayiti dwe Venezyela $2,3 milya dola. Bloomberg ajoute ke Venezyela pral fè chita tande ak lòt peyi sou peman pa yo.
Deklarasyon Venezyela pibliye a di "tout resous yo rekipere yo pral sèvi pou finanse misyon ak gwo pwojè."
Venezyela pa revele konbyen lajan manm akò Petrocaribe yo dwe li depi plis pase 10 zan. Li poko di non plis tou ke okenn peyi, eksepte pou alye politik li Kiba, ap resevwa pwovizyon petwòl aktyèlman.
