Mwayen Oryan
Jòdani ap Raple Anbasadè li an Izrayèl Kòm Pwotestasyon kont Bonbadman Gaza
Jòdani anonse mèkredi ke li ap rantre anbasadè li ki ann Izrayèl kòm pwotestasyon kont bonbadman ke Izrayèl ap fè sou Gaza, kote li pale de inosan k ap pèdi lavi e de kriz imanitè a. Jòdani di anbasadè li a ap tounen Tel Aviv sèlman si Izrayèl sispann aksyon militè li nan Gaza.
Menm jan an tou, anbasadè Izrayèl nan Jòdani, ki te pati, sa gen 2 semenn, nan kad menm pwotestasyon yo, ap gen dwa tounen sèlman sou menm kondisyon yo, dapre ministè afè etranjè Jòdani an.
Yon lòt kote, Sekretè Deta ameriken Antony Blinken ap vwayaje nan Mwayenn Oryan an semenn sa a, pandan Izrayèl ap ogmante atak revanj sou pozisyon Hamas nan Gaza.
Se Pòtpawòl Depatman Matthew Miller ki anonse nouvèl-la nan rankont ak laprès mèkredi.
“Sekretè Blinken al vwayaje Izrayèl ak Jòdani vandredi, sekretè-a pwal rankontre ak Premye-minis Benjamin Netanyahu ak lòt lidè nan gouvènman izraelyen-an pou-l resevwa dènye pwen-yo sou objektif millitè-yo.”
Nan Izrayèl ak nan Jòdani, Blinken pwal travay ak otorite peyi sa yo pou fasilite plis livrezon asistans imanitè pou sove lavi sivil nan Gaza.
See all News Updates of the Day
Hezbollah Revandike Nouvo Atak sou Sòlda nan Nò Izrayèl
Hezbollah Libanè a te di byen bonè Jedi li te tire misil sou sòlda Izrayelyen yo nan nò Izrayèl, yon ti tan apre li te revandike responsablite pou yon lòt atak sou sòlda Izrayelyen ki deplwaye nan sid peyi Liban.
Nan yon deklarasyon, mouvman pwo Iranyen an te di li te "vize yon rasanbleman fòs lènmi Izrayelyen nan Sa'sa ak yon latriye misil", yo presize frap la te fèt a 11:50 pm lè lokal Mèkredi (9:50). p.m. GMT).
Lokal sa a sitiye nan nò Izrayèl.
Etazini: Lajitis Akize yon Anplwaye Gouvènman Paske l Divilge Dokiman Sekrè
WASHINGTON (AP) — Yo akize yon nonm ki te travay pou gouvènman ameriken an paske li te divilge enfòmasyon sekrè ki te evalye plan avan Izrayèl l te gen pou atake Iran.
Se sa dokiman ki depoze nan tribinal yo Mèkredi a revele.
FBI te arete mesye a, ki te idantifye kòm Asif William Rahman, semenn sa a nan Kanbòdj e li ta dwe parèt devan tribinal pou premye fwa nan Guam.
Li pa imedyatman klè ki ajans federal ki te anplwaye li.
Dokiman yo te montre Izrayèl la te toujou ap deplase mwayen militè pou fè yon frap an repons a atak misil balistik Iran an nan premye oktòb.
Izrayèl te fè yon atak revanj sou plizyè sit nan Iran nan fen mwa oktòb la.
Etazini te fè yon Frap Kont Sib Iranyen yo nan Peyi Siri
Washington - Lame Ameriken an te di Lendi li te fè atak kont 9 sib ki asosye ak gwoup Iranyen nan Siri.
Nan yon deklarasyon, lame ameriken an te di atak yo te fèt sou 2 kote nan peyi Siri e yo te yon repons a plizyè atak sou pèsonèl ameriken nan peyi Siri nan dènye 24 trèdtan yo.
Etazini te detanzantan fè atak kont sib ki gen rapò ak Iran tou nan Irak ak nan Siri. An fevriye, Etazini te lanse atak ayeryen an Irak ak Siri kont plis pase 85 sib ki gen rapò twoup Gad Revolisyonè Islamik Iran an ak milis li apiye a, kòm revanj pou atak mòtèl sou twoup Ameriken yo.
"Frap sa yo pral afebli kapasite gwoup Iranyen ap apiye yo pou planifye ak lanse atak pi devan sou fòs ameriken ak kowalisyon yo," lame ameriken an te di apre dènye frap yo.
Etazini gen 900 twoup nan Siri ak 2,500 kay vwazen yo Irak, nan yon misyon pou konseye ak ede fòs lokal yo k ap eseye anpeche Eta Islamik retounen, ki an 2014 te akapare yon bon pati nan tou de peyi yo, men yo te rive kraze l an apre.
Etazini voye bato ak avyon lagè nan rejyon an depi konfli Izrayèl ak Hamas te eklate nan dat 7 oktòb 2023, pou eseye dekouraje Iran ak gwoup ki apiye Iran patisipe nan konfli a.
Fòs Ameriken yo te ede tou tire pou kraze pwojektil Iran te lanse nan direksyon Izrayèl ane sa a.
Hamas Mande Peyi Arab ak Mizilman yo pou Fòse Izrayèl Sispann ak "Agresyon" li
Mouvman Islamis Palestinyen Hamas la te mande peyi Arab ak Mizilman yo pou yo aplike deklarasyon yo te fè menm jou pandan somè yo nan Riyad pou fòse Izrayèl sispann "agresyon" l yo.
Hamas te ekri "Afimasyon dwa nasyonal pèp nou an, premye ladan yo se kreyasyon yon eta Palestinyen endepandan ak Jerizalèm kòm kapital li, mande efò rapid ak solisyon pratik pou fòse (Izrayèl) sispann agresyon li ak jenosid kont pèp nou an, ”
Fanatik Futbòl Izrayelyen Sibi Atak nan Amsterdam
Otorite Olandè yo deklare jèn jan ki tap sikile sou scooter atake fanatik Izrayelyen lanuit la apre yon match foutbòl nan Amsterdam. Sanble atak sa yo dewoule apre apèl ki pibliye sou rezo sosyal yo ki mande pou yo sible Juif yo.
Facebook Forum