Mwayen Oryan
Hamas di li Libere 2 Otaj Ameriken
Gwoup Islamis Hamas la deklare Vandredi li libere 2 otaj Ameriken - Judith ak Natalie Raanan yon manman ak pitit fi - pou sa li dekri tankou "rezon imanitè" apre Qatar te aji kom medyatè.
Biwo Premye Minis Benjamin Netanyahu konfime nouvel la Vandredi.
Hamas fè dappiyanp sou medam yo nan kibbutz (yon espèz de konbit Juif) Nahal Oz la tou pre frontyè Gaza a. Yo nan wout kounyea pou al nan yon baz militè nan rejyon santral Izrayèl dapre yon deklarasyon biwo Netanyahu pibliye.
Laprès Ameriken di medam yo se moun Evanston, ki se yon banlye Chicago.
Potpawol zèl ame Hamas la, Abu Ubaida pibliye yon deklarasyon ki anonse liberasyon an. Se premye otaj yo libere depi nèg ame Hamas yo te antre Izrayèl 7 Oktob pase a epi touye 1,400 moun epi pran apepre 200 otaj.
Chanèl 13 Izrayelyen an konfime liberasyon 2 otaj yo men li pa bay okenn lot detay.
Izrayèl ratibwaze yon katye nan no Gaza pi bonè Vandredi apre li te bay fanmi ki abite nan zon nan 30 minit pou yo chape poul yo. Atak Izrayelyen an frape yon legliz Otodoks Kretyen kote moun te pran abri.
Izrayel sèmante pou l elimine Hamas nèt. Hamas kontwole Gaza. Se konsa Izrayèl lanse atak san gade deye kont anklav la - sa ki mete 2,3 milyon abitan zon nan nan gwo danje. Li entèdi tou livrezon manje, gaz ak medikaman.
Sekretè Jeneral Nasyonzuni al vizite Gaza ak Ejipt Vandredi. Li deklare fok yo pèmèt asistans imanitè antre pi vit posib.
Gen omwens 4,137 Palestinyen ki mouri, pami yo plizye santèn timoun, epi 13,000 ki blese nan Gaza, dapre sa ministè sante piblik Palestinyen an fè konnen.
See all News Updates of the Day
Rubio di Hamas Pral 'Detwi' Si Yo Pa Libere Tout Otaj Izraelyen yo
Sekretè Deta Ameriken an Marco Rubio lanse gwo bout tonton avètisman Samdi bay gwoup Hamas la.
Li avèti gwoup la, lap "detwi" si li pa "kontinye" lage tout otaj li kenbe nan Strip Gaza a, li denonse tou lanmò yon fanmi Izraelyen ki te nan men mouvman islamis la.
Sekretè Deta a te di sou X "Tretman Hamas bay otaj yo, ki gen ladan asasina brital fanmi Bibas yo, montre kòman yo trete otaj sa yo yon fason ki sovaj e se yon lòt rezon ki fè nou di teworis sa yo dwe lage tout otaj yo imedyatman oswa yo dwe detwi," .
Izrayèl Idantifye Rès Kò Timoun Otaj yo, Men Lòt Kò Hamas Remèt la, se pa Manman yo
TEL AVIV, Izrayèl (AP) — Lame Izrayelyèn di li idantifye rès kò de timoun otaj, men lòt kò Hamas te remèt pa manman ti mesye yo.
Militan Hamas te remèt kat kò jedi pandan yon trèv nan lagè ki kòmanse depi plis pase 15 mwa.
Izrayèl konfime youn nan yo se Oded Lifshitz, ki te gen 83 lane lè yo te kidnape l pandan atak Hamas la ki te kòmanse lagè a an 2023.
Lame a di pita yo idantifye rès kò Ariel ak Kfir Bibas, men dènye kò a pa t manman yo, Shiri Bibas, ni okenn lòt otaj.
Yo deklare echèk pou retounen kò kat otaj yo jedi se yon vyolasyon grav akò sispansyon lagè a.
Hamas Remèt Kò 4 Otaj Izrayelyen, Pami yo yon Manman ak 2 Pitit li yo
KHAN YOUNIS, Bann Gaza (AP) — Hamas remèt kò kat otaj Izrayelyen, pami yo yon manman ak de pitit li yo ki te gen lontan depi yo te konsidere yo mouri epi ki te vin tounen yon senbòl soufrans nasyon an apre atak 7 oktòb 2023 la.
Gwoup militan an di li remèt kadav Shiri Bibas ak de pitit li yo, Ariel ak Kfir, ansanm ak Oded Lifshitz, ki te gen 83 lane lè yo te kidnape l. Kfir te pi piti otaj yo te pran jou sa a.
Hamas deklare tou lè kat yo te mouri nan frap ayeryen Izrayèl yo.
Militan yo te mete kat sèkèy nwa sou yon sèn nan Bann Gaza jedi, ak drapo toutotou, anvan yo te remèt yo bay Lakwa Wouj.
Rubio di Relasyon Washington ak Moskou ta Ka Ranfòse Apre Lagè Ikrèn nan
Sekretè Deta ameriken an, Marco Rubio, te di madi apre li te rankontre kont pati li a Ris nan Riyad ke relasyon ant Washington ak Moskou ta ka ranfòse si lagè nan Ikrèn te fini.
Sekretè Deta ameriken an, Marco Rubio, te di madi apre li te rankontre tokay ris li a nan Riyad ke relasyon Washington ak Moskou ta ka ranfòse si lagè nan Ikrèn nan fini.
Msye Rubio di repòtè yo, "opòtinite egziste pou nou kapab gen yon patenarya" ak Larisi, men li te ajoute ke "pou sa fèt, se ta apre konfli sa a."
Nan menm chita pale sa a ak laprès, Marco Rubio te bay plis detay sou chita pale yo, li te deklare "Bon, premye bagay m ta di sè ke nou antann nou sou kat prensip mwen panse ki enpòtan. Dabò, nou pral travay. Nou pral chwazi ekip nou yo, kap travay trè vit pou re-evalye fason misyon 2 peyi nou yo ap fonksyone nan Washington ak Moskou. Pou n ka kontinye vanse nan direksyon sa a, fòk nou gen enstalasyon diplomatik k ap opere e k ap fonksyone nòmalman."
Netanyahu Bay Siy li ap Mache ak Plan Trump pou Wetire Palestinyen yo nan Gaza
JERIZALÈM (AP) — Premye Minis Izrayèl la, Benjamin Netanyahu, bay siy li ap mache ak pwopozisyon Prezidan ameriken an, Donald Trump, pou transfere popilasyon palestinyen an soti nan Gaza. Netanyahu dekri sa kòm “sèl plan ki posib pou pèmèt yon avni diferan” pou rejyon an.
Li te diskite sou plan an dimanch ak Sekretè Deta ameriken Marco Rubio, ki t ap kòmanse yon vizit nan Mwayen Oryan an. Rubio apiye objektif lagè Izrayèl la nan Gaza epi li deklare Hamas “dwe elimine.”
Sa mete plis dout sou yon trèv ki deja frajil, paske dezyèm faz negosyasyon yo poko kòmanse. Rubio pral vizite kèk gwo aktè rejyonal, tankou Arabi Saoudit ak Emira Arab Ini.