MTS (ki se Mobile TeleSystems) opere nan LaRisi, Belaris, ak Ameni kote li founi sèvis telekominikasyon pou yon afè 80 milyon abòne.
Lenta.ru, yon gwo ajans nouvèl ki se pwopriyete bank leta Sberbank ki li menm se pwopriyete gouvènman ris la, rapòte:
« MTS se premye konpayi nan LaRisi ki prezante iPhone 15 Pro Max nan youn nan prensipal magazen-li, yon jou anvan li koumanse vann nan mond la… »
Nan mwa Fevriye pase, Depatman Komès Etazini, kòm repons pou lagè LaRisi nan Ikrèn nan ki t-ap kontinye, te mete plis restriksyon sou ekspòtasyon ki pwale nan LaRisi, e sou lis la 276 atik de luxe, ladann tout telefonn entelijan ki vo plis pase 300 dola.
Sepandan, lavant iPhone nan LaRisi te kontinye. Dapre jounal biznis ris Vedomosti, nan finisman 2 premye trimès-yo an 2023, LaRisi te enpòte 1 milyon 100 mil iPhone – yon ogmantasyon 15 pousan konpare ak menm peryòd la an 2022, men mwatye sa ke li te enpòte nan peryòd Janvye a Jen 2021.
