LaChin ak LaRisi te pwofite 2èm jounen Somè BRICS la ki reyini yon pakèt ekonomi, pou kritike Lwès la, pandan yo mete sipò yo dèyè sa ke yo pwopoze ki se ogmante manm gwoup la ki parèt kòm yon lòt chwa devan loksidan.
Lidè Brezil, End, ak LaChin, yo reyini nan Afrik di Sid – kote evènman an ak dewoule a – pandan Prezidan ris Vladimir Putin ap patisipe sou entènèt.
Nan konferans video, Putin – ki te òdone pou LaRisi anvayi Ikrèn ane pase – di se aksyon loksidan ki te mennen nan konfli a, lè Lwès t-ap “pouse dominasyon-l”, nan fè konnen kòmkwa “yo-menm se yon bagay espesyal”, kote yo kenbe lòt peyi yo anba politik “neo-kolonyal”.
“Sa ki gide aksyon nou nan Ikrèn se yon sèl bagay, se mete fen nan lagè ke loksidan lage dèyè nou an,” se pawòl Putin ki t ap pale pandan yon entèprèt t ap tradui.
Pandanstan, lidè Brezil ak Afrik di Sid ensiste sou nesesite pou gen yon solisyon pasifik pou lagè Ikrèn nan – men san kritike Moskou.
Bò kote pa li, lidè chinwa Xi Jinping fè wè ke mond la antre nan kèk gwo chanjman, e nan yon nouvo peryòd “boulvès ak transfòmasyon.” Li akize peyi ki fòme sa li rele “blòk ki rejte tout lòt yo” pou pwoblèm nan.
Li di pandan yon entèprèt t ap tradui pou li, “Mantalite lagè frèt la rete kole nan mond nou an e tansyon ap moute nan sityasyon jeo-politik la.”
