Sekouris yo jwenn 8 kadav nan zon kote yon djèt prive tonbe Mèkredi. Pami non ki te sou lis pasaje yo te genyen Chèf gwoup mèsenè Ris Wagner la, Yevgeny Prigozhin, dapre sa ajans nouvel leta Ris, RIA rapote.
Dapre ajans la operasyon sekou yo ap rapousuiv.
Pa gen okenn konfimasyon ke Prigozhin te abo avyon an vreman vre. Li tonbe o no Moskou. Ajans aviyasyon Larisi a konfime non misye te sou lis pasaje yo.
Pi bonè nan jounen an, ministè sityasyon dijans Larisi te pibliye yon deklarasyon kote li di te gen 10 moun abo avyon prive Embraer Legacy a, e ke li tap vwayaje soti Moskou pou ale St. Petersburg.
Reyaksyon Lamezonblanch:
Lamezonblanch fè konnen Prezidan Joe Biden ranseye sou aksidan avyon an.
Pandansetan reyaksyon kòmanse tonbe toupatou nan mond lan:
Potpawol Sekirite Nasyonal Etazini: " Nou wè nouvèl yo. Si l konfime pèsonn pa dwe etone."
Reyaksyon Entènasyonal:
Premye Minis Estoni di CNN:
"Si se vre sa montre Prezidan Larisi Vladimir Putin pral elimine tout opozan li yo e sa kraponnen nempòt ki moun ki anvizaje eksprime yon opinyon ki diferan ak pa li."
Palmantè Britanik Alicia Kearns sou rezo sosyal X:
"Rapidite gouvènman Ris la pran pou konfime Yevgeny Pritozhin te nan avyon ki tonbe pandan li tap soti Moskou pou al St. Petersburg ta dwe di nou tout sa nou gen pou konnen. Nouvèl ki di kòm kwa Aviyasyon Larisi desann avyon an sigjere Putin ap voye yon mesaj klè ki sonnen fò.
Minis Afè Etranjè Poloy Zbigniew Rau di televizyon leta TVP Info:
"Nou ta gen anpil difikilte pou n site okenn moun ki kwè sa se yon kowensidans. Li rive ke opozan politik Vladimir Putin konsidere tankou yon menas pou pouvwa li pa mouri yon mò natirèl.
