Zak vyolans gang yo kap trakase Ekwatè depi 2 zane, rive nan yon nivo grav peyi a poko janm konstate apre yon kandida a la prezidans ki gen renome pou pawòl piman bouk li konn lanse kont katèl yo ak responsab koronpi yo mouri pa bal pandan li tap mennen kanpay nan kapital peyi a, Quito.
Asasina Fernando Villavicencio rive Mèkredi, mwenske 2 semèn anvan yon eleksyon prezidansyèl espesyal.
Misye patap mennen nan sondaj yo men asasina a, ke Prezidan Guillermo Lasso sigjere se travay mafya, te rann pi grav yon kriz ki lakoz dè milye moun mouri. Sa montre sou gwo defi ki pral devan pwochen lidè peyi a.
"Moman sa a grav e chokan pou Ekwatè. Map siyen 2 dekrè youn ki deklare 3 jounen dèy nasyonal pou onore memwa patriyot Fernando Villavicencio Valencia epi dezyèm nan deklare yon eta deksepsyon pou 60 jou. Fos zame yo pral mobilize atravè teritwa nasyonal la pou asire sekirite sitwayen yon, lapè nan peyi a epi eleksyon lib ak demokratik 20 Out jan konsèy nasyonal elektoral la te prewa l."
Nan dènye diskou li anvan li te mouri asasinen, Villavicencio, 59 an, te pwomèt foul la, ki tap chante epi bat bravo pou li, ke li pral dechouke tout koronpi yo epi mete "vòlè" peyi a nan prizon.
" Lè moun mande m ki kote li pral jwenn lajan an, mwen di peyi sa a rich. Peyi sa a pa bezwen kòb. Li gen twòp volè sèlman. Se sak pwoblèm peyi a. Donk fòk nou mete vòlè yo anba kòd."
Biwo minis jistis Ekwatè deklare gen yon sispèk ki mouri nan men lapolis akoz blesi li te sibi pandan yon echanj kout zam apre asasina a.
Lapolis lanse plizyè operasyon nan diferan katye Quito epi arete 6 moun.
Villavicencio te di piblikman ke l te resevwa plizyè menas lanmò, pami yo bò kote afilye katèl Sinaloa Meksiken an, ki se yon gwoup kriminèl entènasyonal òganize kap opere kounyea nan Ekwatè. Li te di kanpay li reprezante yon menas pou gwoup sa yo.
Fanmi Villavicencio mande Jedi pou yo remèt ba yo kadav la pou yo ka planifye fineray li.
Galo Valencia se mononk Villavicencio.
"Nou suiv tout pwosesis ak pwotokòl yo. Yo fè otopsi a yè swa. Nou resevwa otorizasyon pou transfere li nan lye kote nou pral antere l e nan moman sa a yo resevwa lòd vèbal Minis Jistis peyi a pou kenbe kadav la nan mòrg. Nou pa konnen poukisa."
Enfòmasyon pou repòtaj sa a soti nan Associated Press.
