Defans anti-aeryen desann pou pi piti 10 dronn, dapre sa dirijan yo di, men debri ki tonbe al frape bilding kote moun rete nan plizyè distri nan Kyèv. Debri yo donmaje bilding, deklannche dife, e blese 3 moun pou pi piti.
Se tanzantan LaRisi vize vil nan Ikrèn nan atak aeryen ki fèt sitou ak dronn ke Iran fabrike.
Se ak dronn sa yo Ris yo sot lanse 3èm vag atak nan lannwit youn apre lòt sou Kyèv.
Prezidan Joe Biden mete fen nan yon somè l-OTAN ke li kalifye kòm istorik, kote li pale de detèminasyon pou sipòte Ikrèn, e li voye yon gwo avètisman bay Moskou.
Li di: “Jouk kounyea, LaRisi pa moutre li enterese pou konfli a fini nan diplomasi. Putin kontinye kwè ke Ikrèn ka bouke goumen. Putin kontinye doute ke nou gen ase volonte pou nou kontinye jan nou ap fè a. Li kontinye ap twonpe tèt li,” se pawòl Biden.
Reyinyon 2 jou ki soti dewoule nan kapital Lituani an te wè yon sipò renouvle pou Ikrèn antre nan alyans la, men pa te gen yon kalandriye pou sa fèt, jan Ikrèn te vle li a.
Nan somè l-OTAN ki sot dewoule nan Lituani an, Etazini defini limit alyans la pou rive sou fwontyè rejyon Endo- Pasifik-la. Li di lè li santre sou defi ke LaChin poze a, sa pa vle di ke blòk l-OTAN an ouvè pou nasyon ann Azi yo.
Anbasadè Etazini nan l-OTAN Julianne Smith ki t ap pale ayè mèkredi a nan Lituani di: “Nou pa pwal ajoute manm Endo-Pasifik.”
