LaRisi di atak Ikrèn nan touye yon sivil e blese 36 lòt.
Yon lòt kote, Ikrèn ak LaRisi boukante akizasyon kote chak di se lòt la ki vle atake izin nikleyè Zaporizhzhia.
Gen kè-sote pou izin sa a depi lè LaRisi te anvayi Ikrèn nan mwa Fevriye 2022. Ajans Nasyon Zini ki ap swiv aktivite nikleyè a avèti plizyè fwa ke nenpòt bonbadman sou li ta deklannche yon katastwòf nan zòn nan.
Plis sipò pou Ikrèn, se sijè ki nan tèt pwogram l-OTAN pandan li ap pare pou somè li ki fèt chak ane, e ki pwal dewoule fwa sa a 11 ak 12 Jiyè nan Vilnius, kapital peyi Lituani. Kyèv ap ekzòte alyans la pou mete li sou yon liy ekspress ki ta fasilite l vin manm l-OTAN san fòmalite nòmal yo.
Sepandan, kèk alye, antwòt Etazini ak Almay, pako apwouve lide sa a. Gen kesyon ki pako gen repons tankou ki jan yo ka aplike atik 5 ki prevwa pou yon manm l-OTAN defann tèt li, lè li nan lagè ak LaRisi.
Alye l-OTAN yo pwal chache antann yo tou sou yon nouvo angajman pou yo envesti pou pi piti 2 pousan nan pwodwi enteryè Brut yo nan defans, pandan gen enkyetid kote kèk peyi pa kenbe angajman sa a.
