Nan yon entèvyou ak televizyon Ris RT, Lavrov di ke Anbasadè Ameriken Lynne Tracy te pale ak kèk reprezantan Larisi dimanch e ke li te bay kèk "siyal" kòmkwa Etazini pa te patisipe nan rebelyon an, men li di ke li espere ke asenal nikleyè Larisi a te an sekirite.
Li site tou pawòl Tracy ki di revòlt la se koze entèn Larisi.
Plizyè lidè nan loksidan di ensidan an montre enstabilite ki ap grandi nan Larisi akoz desizyon Prezidan Vladimir Putin te pran pou l voye fòs lame l nan Ikrèn nan kòmansman ane 2022 a.
Yo te mande Lavrov si gen prèv ki ta montre ke sèvis entèlijans nan Ikrèn oswa nan loksidan te enplike nan revòlt la:
Li reponn "Mwen travay nan yon depatman ki pa kolekte prèv sou aksyon ilegal, men nou gen estrikti pou sa, e mwen asire w, yo deja konprann sa."
Gen dout sou avni Wagner e sa soulve kesyon pou konnen si li pral kontinye operasyon li nan peyi Afriken yo tankou Mali ak Repiblik Afrik Santral (CAR), kote fòs li yo enplike nan konfli entèn ki la depi lontan.
Depi konfli Ikrèn nan te minen relasyon ak komès ke Larisi te gen ak peyi Lwès yo, Kremlin te ensiste tou sou angajman li ann Afrik.
Lavrov di RT ke Mali ak CAR kenbe kontak ofisyèl ak Moskou ansanm ak relasyon yo ak Wagner, e li ajoute: "Plizyè santèn militè ap travay nan CAR kòm enstriktè; travay sa a ap kontinye."
Lavrov di tou akizasyon Ikrèn kòmkwa Larisi gen plan moute yon atak sou izin nikleyè Zaporizhzhia nan sid Ikrèn "sa pa fè okenn sans,".
