Toupatou nan eta Florid, travayè pat reponn prezan nan djòb yo - swa nan konstriksyon, plantasyon tomat, restoran, magazen ak lòt ti biznis.
Poukisa? Eben se paske yap pwoteste kont yon nouvo lwa eta Florid adopte ki enpoze restriksyon sou imigran ki san papye yo. Yo rele manifestasyon sa yo
"yon jou san imigran".
Gouvènè Florid Ron DeSantis te siyen lwa a mwa pase a pou kore pwogram li anvizaje a pou voye migran yo ale epi limite sèvis sosyal ki a la dispozisyon imigran ki pa gen stati legal Ozetazini.
DeSantis lanse kanpay a la prezidans li pou eleksyon 2024 la semèn pase a. Lap chache reprezante pati Repibliken an nan eleksyon sa a.
LULAC, yon gwoup dwa sivik Latino lanse yon avètisman pou di latino yo fè fas ak anpil risk si yo deside vwayaje nan eta Florid.
