Chef gwoup paramilitè LaRisi Wagner di fòs li yo te moute yon drapo ris sou bilding adminstrasyon an nan Bakhmut e ke “legalman” yo pran kontwòl vil la, pou repete pawòl chef Wagner a.
Lame Ikrèn nan fè konnen fòs ris yo te kontinye atake Bakhmut, men ke twoup Ikrèn yo te “kenbe la ak tout kouraj yo e te repouse plizyè atak lènmi an.
Prezidan Ikrèn Volodymyr Zelenskyy di ayè dimanch la nan pale chak swa ak pèp la ke sityasyon an te “cho anpil” nan Bakhmut dimanch.
Yon lòt kote, Sekretè Deta Anthony Blinken mande LaRisi pou lage touswit repòtè jounal Wall Street Evan Gershkovich, ke LaRisi akize pou espyonaj, lè Blinken te pale ak Minis Afè Etranjè ris Sergey Lavrov nan telefòn ayè dimanch la.
Kòm repons pou Blinken, Lavrov di se yon tribinal nan LaRisi ki pwal detèmine sò Gershkovich e li di Blinken sa pa akseptab pou Washington fè ka a tounen yon afè politik. Lavrov di yo bare jounalis la an flagran deli kidonk ak men li nan sak la, malgre LaRisi pako bay okenn prèv.
