Ma te prezidan Taiwan nan peryòd kote zile a te gen bon relasyon ak Peken, men li te kite pòs la nan yon moman sonb apre yon antant komèsyal ak Gran Chin nan pa te jwenn apwobasyon pandan te gen pi gwo pwotestasyon nan zile a depi ane 1990 yo.
Ma pwopoze pou fè vizit sa a pandan Lame Liberasyon Popilè LaChin nan ap voye djèt konba nan direksyon Taiwan preske chak jou, e pandan kominikasyon ofisyèl ant 2 gouvènman yo kraze. Gouvènman LaChin nan di Taiwan se yon pati nan teritwa nasyonal li, men gouvènman ki ap dirije Taiwann kounye a fè konnen li deja yon leta souvren ki pa nan LaChin.
Ma, ki se yon manm Pati Nasyonalis la (Kuomingtan) ki nan opozisyon, pwal nan tèt yon delegasyon ki ap gen ladann pwofesè inivèsite ak etidyan ak kèk moun ki te travay nan prezidans li a, e ke yo tout ap an Chin soti 27 Mas pou rive 7 Avril, se sa biwo li a di dimanch.
Li anonse ke li ap mennen etidyan inivèsite soti Taiwan pou al rankontre ak etidyan nan Inivèsite Fudan nan Shanghai ak nan inivèsite Hunan nan Changsha.
Biwo Afè Taiwann nan LaChin nan konfime vizit la tou.
