Prezidan Etazini Joe Biden ap rankontre ak Prezidan Komisyon Ewopeyen Ursula von der Leyen vandredi nan Mezon Blanch pou yo pale sou sanksyon posib kont LaChin pandan gen kè-sote kòmkwa LaChin ap pare pou voye zam bay LaRisi, ak fristrasyon Ewòp poutèt plan Washington genyen pou bay konpayi ameriken yo sibvansyon nan kad Lwa pou Redui Enflasyon an.
Biden ak von der Leyen pwal pale tou sou jan Etazini ak Inyon Ewòp la ap kòdone ansanm pou konbat kriz klima a nan envesti nan teknoloji pwòp ki baze sou chèn distribisyon machandiz ki asire, se sa sekretè laprès Mezon Blanch Karine Jean-Pierre di nan yon deklarasyon.
Rankont sa a se dènye nan yon seri reyinyon diplomatik nan wo-nivo ak lidè Ewòp yo pou kòdone sipò pou ede Ikrèn defann tèt li kont yon envazyon LaRisi. Biden te rankontre ak chanselye alman Olaf Scholz nan Washington, semèn pase a. Mwa pase-a li t-ale Kyèv pou wè ak Prezidan Ikrèn Volodymyr Zelenskyy, e apre sa nan Vasovi, nan peyi Polòy, pou yon vizit ak Prezidan Andrzej Duda e ak lidè yo nan gwoup Bucharest 9 la.
