« Demokrat kou Repibliken gen menm konklizyon an: nou bezwen fini nèt ak gè Irak la, yon fwa pou tout. E pou nou fè sa, nou dwe etenn otorite legal ki te tanmen gè a pou koumanse, » se lidè Majorite nan Sena-a Chuck Schumer ki te pale konsa sou tribin Sena a semèn pase a, pandan li t ap chante lwanj pou efò sa a ant 2 pati yo.
Palmantè yo te fè plizyè tantativ nan ane ki pase yo pou anile otorizasyon 2001 ak 2002 pou Anplwaye Fòs Militè, ke yo te pase nan Kongrè a apre atak teworis 11 Septanm 2001 yo, ki te bay prezidan yo anpil pouvwa pou lanse operasyon militè san apwobasyon Kongrè a jan konstitisyon an mande a.
Jouk kounyea, chak tantativ te echwe pandan te gen kritik ki di kòmkwa si Kongrè a elimine otorizasyon sa yo, sa ap mete an danje sekirite nasyonal Etazini ak fòs ameriken yo nan lòt peyi.
Anplis de elimine otorizasyon pou gè Irak la, pwojè lwa a ki nan Komisyon Afè Etranjè Sena a, semèn sa a, ta rantre lwa 1991 ki te otorize Prezidan George Herbert Walker Bush voye fòs nan Irak.
