Dirijan Ikrèn yo mande pou alye-yo nan loksidan voye djèt-yo pou yo ka reponn pi byen yon envazyon LaRisi, men pou kounye-a, apèl sa-a pa chofe nan tèt lidè-yo.
Lè jounalis mande si LaFrans ap konsidere voye djèt konba bay Ikrèn, prezidan franse Emmanuel Macron di ayè lendi-a, li pa ekate okenn lide, men li poze plizyè kondisyon pou sa ta fèt. Pami yo, fòk yo pa ta touche teritwa LaRisi, p-ap ogmante tansyon e p-ap febli kapasite lame franse-a.
Nan Etazini, lè Prezidan Joe Biden te rive nan Mezon Blanch lendi, jounalis te mande-l si l-ap voye avyon konba F-16 nan Ikrèn. Biden reponn « Non ».
Yon lòt kote, otorite LaFrans ak Ostrali fè konnen y-ap pwodui plizyè milye boulèt kanno 155 milimèt. Se konpayi zam franse Nexter ki ap pwodui yo, pandan Ostrali ap founi poud pou pyès kanno. Premye chajman-yo ka rive nan Ikrèn vè finisman mwa Avril.
