"Te gen anpil moun ki te konplis nan dosye sa nan mitan fòs polis la. Te gen anpil moun nan fòs lame a tou ki konplis," se deklarasyon sa Lula te bay jounalis yo.
Li kontinye poul di "Mwen konvenki ke pòt palè a te louvri pou pèmèt moun sa yo antre, paske mwen pa wè ke pòt la te kase."
Lula te ogmante kritik li kont fòs lame a tou dapre li pa fè anyen pou dekouraje patizan Bolsonaro ki gen 2 mwa deyò katye jeneral yo, kote yo t ap plede mande militè a ranvèse rezilta eleksyon mwa oktòb yo.
Dimanch 8 janvye, plizyè milye manifestan ki t ap mande yon kou deta militè pou chase Lula sou pouvwa epi retabli Bolsonaro nan tèt peyi a, kote yo te anvayi Lakou Siprèm nan, Kongrè a ak palè prezidansyèl la.
Fòs lapolis ki responsab sekirite piblik nan kapital Brezil la pa t anpeche foul la avanse sou bilding lan, e kèk nan yo te pran selfie ak pale ak manifestan yo.
Lapolis te gaye foul la ak gaz lakrimojèn epi yo te arete anviwon 1,800 manifestan apre Lula te bay lòd pou gouvènman federal la entèvni ak fòs sekirite lokal yo.
