Repibliken Kevin McCarthy resi konvenk plis pase yon douzèn kolèg Repibliken pou yo vote pou li nan vot dramatik ki dewoule nan Lachanm Depite Etazini an Vandredi, kote lap goumen pou li eli pwochen lidè Lachanm nan. Men jiskaprezan se pa ase.
Tout depite yo rasanble nan Lachanm pou vote pandan yon 4èm jounen pandan mond lan ap suiv yon hing hang politik ki reprezante yon defi pou demokrasi Ameriken an.
Pami depite ki chanje lide, gen kèk konsèvatè ki fè pati gwoup Freedom Caucus la. Depite sa yo te sèmante yo pap janm vote pou McCarthy dirije yo. Youn nan rezon ki lakoz amelyorasyon sityasyon an se ke McCarthy te aksepte akode demann opozan li yo - ki te mande pou li re-mete an plas yon règleman Lachanm ki ta pèmèt yon sèl depite oganize yon vot pou dechouke li kom lidè.
Zizani ant Repibliken yo lakoz nouvo lejislati a paka fè anyen nan moman lap komemore dezyèm anivèsè revolt 6 Janvye 2021 an kote patizan ansyen prezidan Donald Trump te atake Capitol la (syej palman an) pou bloke pwosesis sètifikasyon rezilta eleksyon prezidansyèl Joe Biden te genyen an.
Jim Clyburn se yon Demokrat ki reprezante Kawolin di Sid nan Lachanm.
" Pa gen oken dat nan listwa ki souliyen pi byen enpotans pousuit sa pase 6 Janvye 2021. Sa fè egzakteman 2 zan ke yo te teste angajman nou lè yon foul ki te eseye ranvèse gouvènman Ameriken an te atake Capitol nou an epi menase entegrite demokrasi sa ak Konstitisyon nou. Grandè ak reziyans demokrasi nou te an danje men nou suviv."
Pandan kèk minit, Repibliken ki bouke ak spektak politik la te vire do yo pati, lè youn nan opozan pi fewos McCarthy te komanse joure misye.
Depite Matt Gaetz ki reprezante Florid di li pa fè McCarthy konfyans.
"Pou ou ranpote pos lidè a fok ou gen ase vwa. Misye McCarthy pa gen ase vwa jodia. Li pap gen ase vwa demen. E li pap gen ase vwa semèn pwochèn, mwa pwochen, ane pwochèn. Donk fok nou reflechi pou mande eske se vanite ki lakoz misye fè kalkil la epi li kontinye trennen enstitisyon an nan labou konsa aloske li konnen sa ki inevitab?"
Pandan enpas sa a, nouvo depite eli Lachanm yo poko prete sèmen antanke palmante lejislati ane 2023-2024 la.
McCarthy deklare pa gen oken plan pou sispan travay pandan wikèn nan. Sepandan gen yon Repibliken ki di lap difisil pou egzije yo rete Washington.
Enfomasyon pou repotaj sa a soti nan Associated Press
